Tenokdangba atema US dak mang ayangtsü N Korea-i nangzük

Pyongyang, August 07 (Agencies): Nuclear raraba oset yangluba sentong anema United Nations-i sanction tasen agütsüba asoshi US-i iba taa meyiba agitsü aser mang ayangtsü, ta North Korea-i nangzük.
UN nung Honibarnü agizüka ayuba tenokdangba ya asen tashi temeden anema inyakba lir, ta North Korea indang KCNA news agency ajanga ashi.
North Korea den yimjung ken o jembitsü asoshi maongka agütsüba ya temolung magütsüba maparen ka dang lir, ta aija iba ken o jembitsü North-i magizük, ta South Korea-i sangdong balaka nung ashi.
Iba sanction ya North Korea indang ali rongsen tanga linük nung oa ayokba shilem asem agi tajemba kümdaktsütsü mechi agitsü.
North Korea-i missile ana tashi adonga tendangba ajanga Korean peninsula nung tebilemtsü tali akümba sülen UN Security Council ajanga iba telemtetba ya agi.
North Korea-i maneni nuclear amshia raraba oset yangluba sentong ya inyaktsü, ta Hombarnü sangdong.
US nungi amokmerenba tensa ka nung pei kümzüka ayutsü asoshi yangluba nuclear inyakyim ya tangatetep kati arutsü asoshi jembiba sabang nung Pyongyang-i magütsütsü, aser iba mapa tamajung inyakba asoshi US dak kaotsü, ta UN tenokdangba temzüng yangluba nung America-i shilem agiba amokmerena North Korea sorkar meyong KCNA news agency ajanga ashi.
Philippine yimtiba Manila nung osangbener den jembidang, “Korean peninsula nung tensa tamajungba kümdaktsüba aser nuclear ken o ya United States ajanga lir,” ta North Korea odongtar, Bang Kwang Hyuk-i ashi.
“Nuclear aser ballistic missile indang sentong ya ‘negotiating table’ nung bener arua medoktsütsü aser nuclear tashi itshiba nung amshiba budget inch kata marakzütsü,” ta pai shisem.
Deobarnü Manila nung Association of Southeast Asian Nation (Asean) senden amenba mapang North aser South Korea foreign minister ajurutep, ta osang prokshiba mapang iba telangzüba ya agütsü.
South Korea indang Foreign Minister Kang Kyung-wha aser North Korea indang Foreign Minister Ri Yong Ho na iba senden nung chiyongba mapang teka amteba salem asü, ta South Korea indang osang ajanga ashi.
Aji süaka linük ana tsüngta ajurutepa yimjung ken o jembitsü asoshi South Korea-i asüngdangba ya North-i magizük.
“South-i iba ama sentong tajung asüngdangba ya North-i jungjunga bo senzüka medoktsü amai ni bilemer,” ta Pyongyang indang tembar linük, China nung Foreign Minister-i osangbener dang Hombarnü ashi.
Taoba mapang Pyongyang anema tanga linüktemi jembidang Russia aser China nati iba linük busema jembia aru saka North Korea-i missile tendangba anetsü asoshi United Nation Security Council ajanga Honibarnü tenokdangba tasen agütsüba nung iba linük ana ya densema agütsüogo.