Tensa apir South Korea & US ‘drill’ tatsüba agir

Seoul, Metsüremi 16 (Agencies) : Pyongyang den ‘diplomatic’ tsütsü tera atsüanem akaba mapang ka nung tang South Korea o United States na kümshi koba ‘joint military exercise’ agir ibaji tatsüba agitsü renemdagi, ta tanü Rogonü osang ka ajanga metetdaktsüogo.
Kümshi metsü mapang linük ana longjemer ‘Key Resolve’ & ‘Foal Eagle drills’ agiba ajanga nuclear nok-o-nü akasang North jashidakja liasü kechiaser ibaji par lima anema apusotsü atema renemshir ta parnoki (North) aija aruogo.
Aji oda süaka, taruba ita nung Seoul o Pyongyang na temaba jenjang nung senden amentsü ta tawa South Korea-i sangdongogo aser May ita tatemlenjibo North Korea lenir Kim Jong Un den ajuruteptsü ta US Tir, Donald Trump-ia shiogo.
Tan taoba nung akaba Winter Olympics asayamong mapang tesendaktep yanglushiba ajanga tang Korea ana US tsüngda iba tensa nung lir.
Taoba ita South nung Pyeongchang Winter Games asayamong akaba den metsükteptsü mechi ‘joint exercises’-ji mapang tatsüka atsülanga ayu.
Aji oda süaka, Seoul presidential office nungi ketdangser tazüng kati ashiba agibo, iba ‘drill’-ji agiyonga kecha masü, ta taoba hopta nung South Korea nunger teshimtet telok ka den jembidang Kim-i metetdaktsü.
US nungeri tongpang nung amshiba B-1B bombers aser tayimtsü abenba jahaz amshia amakbayim koba tensa mesüngjemteti aliba mapang Korea nunger tzümeketli nungsa aiben tendanga liasü, ibaji tan yabo mamshitsü, ta South nungi Yonhap news agency ajanga metdaktsü.
Parnoki ashiba agi, sepai meyi aika adenshir moapu nung ‘Foal Eagle’ ta ajaba exercise-ji April ita tetenzüklen nungi agitsü saka ita ana masü ita ka dang agitsü renema lir.