Tensa mashi nung Messi dang nungia Ronaldo-i tasayatetba: Alex

Dublin, May 18 (Agencies) : Manchester United telok nung tesüiba mapang coach Alex Ferguson-i, tensa mashi ka nung Real Madrid nungi nüngtugu striker Cristiano Ronaldo-i FC Barcelona nungi Lionel Messi dang football tajungba asayateter, ta ashi.

Convention Centre nung ‘golfer`s foundation’ sentong akaba mapang golf asayar Rory McIlroy den jembiba mapang Ferguson-i nüngtugu football asayar ana tsüngda asadanga jembi.

2003 nungi 2009 tashi Ronaldo Manchester United nungi asayaba mapang Ferguson coach liasü.

Ronaldo aser Messi na shiba tajungba ta mapang shia asadanger.

Ronaldo Manchester United nungi Madrid nung adenba mapang, 2009 küm, nungi La Liga asayamong nung Messi tena ka mesüra kati goal timba yokba sempet ngua arur.

Ajisüaka tan mongpubo Messi’er telok nungi Luis Suarez-i goal 40 yoka Golden Boot ngu iba otsü raksatsüogo.

“Messi-i ball amshibaji tetsü nung slipper semer kanga sadema jajar amai lir, ajisüaka Ronaldo tena balala. Ronaldo-i tom nung aruba ball tem kang junga agizüka asayateter aser tesem mashi nungi tetsüng anatsü agi ball metsüteter,” ta Ferguson-i ashiba Irish Independent osang ajanga Mongulbarnü metetdaktsü.