Tenük telen shia tekümzüksang

“Saka asen temang tenük telentem koba tali akhüm taketba lir; item jagi kecha menüngdaker ama lir. 1 Korint 12:24.

T. Pauli Korint nung aliba tamangertem den pai mezüng shidi nung lemsatepba angur. Khrista temang nung tamanger shiaji tongtibang shilem kaka lir. Nisung temang rangben ajungtsü asoshi tenük telen shia koma mapa inyaker iba den medemdanga, Pauli tanela sempet balala ishika shia angur (vs 8-10). Korint nung aliba tamangertemji, sobaliba balala, sempet balala, aser yimya yimko balala süaka, parnokji tanela kasai sünga aser kasa Khrista temang meyong lir ta shia angur.
Nisung temang nung tenük telen tila aser tashimait saka tongtibang ta Pauli shisembaji, yamaji tamanger shia pei mapa balala inyaktsü nüngdak ta shinüba lir. Tenük telenji ka dang nungi ka tenüngdakba masü.
Marvin Williams yamai ashir, “Tsüngremer lokti yanglutsü asoshi, Yisui asenok shia nem teinyaktsü kaka nunglokja lir ta bilemtetang” Atangji, asen kibong, loktitem aser Arogotem tamang aser tanela ka nung Tsüngrem tenüng nung nokdaktetsübaji kati ka yaritepba lira Tsüngremji asenoki teti peladaktsür aser ibaji asenok temoatsü.
Sarasadem : Tsüngrem onok tashi mait aika liaka koba nai onok nem kechi inyaktsü nungloktsü ibaji shitak inyaktettsü tashi agüjangma.
Amen