Tenük tenlatsü atema ajungshiteptsüla: Venkaiah Naidu

Chennai (Tamil Nadu), Chiteni/July 07, 2018: Tanü Chennai nung linük tatong Tir, M Venkaiah Naidu-i Indian Intraocular Implant & Refractive Surgery Convention-2018 tenzüktsüba sülen pai souveiner sayaba noksa nung angur. 

New Delhi/Chennai, Chiteni/July 07 (Agencies): Tenük tenlatsü atema ajungshiteptsü kanga nüngdak, ta shia tanü linük tatong tir, M Venkaiah Naidu-i, nükpoker ka tenük agi ngudaktsütsü atema yaritsü asoshi school tanurtem nem tesayuba agutsütsüla, ta ashi.
Tanü Chennai nung 32buba Intraocular Implant & Refractive Surgery Convention tenzüktsüba sülen jembidang Naidu-i, tenük tenlaba nung tenük doctor tem aser surgeon temi tongtibang shilem ka agitettsü, ta ashi.
“Tenük tenlatsü atema tenangzükba agitsü asoshi asenoki nisungtem ajungshitsü nüngdak. NPCB (National Programme for Control of Blindness)-i 2017-18 küm tenük tenlartem 50,000 alizüng ayuba atema pelar, aser iba nungjagi tenük tenlar 69,343 bo jungogo,” ta Naidu-i ashi.
Naidu-isa, ano alizüng timtiba ayutsüla aser ibaji tongtettsü atema inyaktsüla, ta ashi.
“Nükpoker ka tenük agi ngudaktsütsü atema yaritsü asoshi school tanurtem nem tesayuba agutsütsüla,” ta pai ashi.
Tanüasüng libaliro melenshiba dak sendakba nung Naidu-i, tanüasüngbo temang anema alitsü atema physical activity kangabo mali anungji ajaki, talisa lanurtemi temang anema alitsü atema exercise agitsüla, ta ashi.
“Tanurtem rongnung tenük timtem kanga bulur. School-i aoer tanurtem nükrangtsü kaloker aoba angudang meimja bilemer,” ta pai ashi.
Naidu-i, libaliro melenshia physical activity khenyongi maliba ajanga tashidak balala adoker, talisa diabetes tashidak adoker, ta ashi.
“Anema alibaji rongsen. Na anema lira nai rongsen bendentettsü, ajisüaka na rongsen liaka na anema malitsüa akok ta nisungtemi jembir,” ta pai ashi.
Linük tatong Tirisa, tanurtem video games asayaba, mobiles, computers aser televisions reprangba ajanga tenük nung timtem adoker, ta ashi.
Centre indang National Health Protection Scheme dak sendakba nung Naidu-i, iba scheme atema sen crore 54,667 lemzükja lir, ta metetdaktsü.