Tenükmeyiba Tsüngrem

Anüng ali aser iba telong aser tema nung aliba kechisarina ajak yanglusang Tsüngrem ka dang lIr aser ibaji asenoki külemba Yihovah Tsüngrem lir. Iba dakji alaka nisungi teka agi yangluba taribi mesüra hon tsüngrem kecha mekülemtsübaji Tsüngremi nisungtem nem agütsüba mezüngbuba ozüng lir. Ajisüaka, asenoki Teyanglusang külemtsü melen teyangluri yangluba osettem mesüra shiruru mesüra anü, ita aser petinutem dang külemer. Ibaji pei tebu dang oba ta ajatsü melena tebui yanglua yutsüba ki oset ka dang oba ta ajaba den kasa lir. Meimchir tamashiji aji asütsü aser lendongji yangji keta lir. Israel nunger lenir Mosa ya Tsüngrem akümtsübuba aser Tsüngrem meimba lenir dang masü saka par nübortem kanga meimba lenir ka liasü. Iba temeim jagi pai Israel nungertemi Tsüngremi ashi mangai mashileni aotsü kanga shisabolua bilem. Pa atema ano shisabolutsü kaji pabo tenangzükba lima, alima tajung, Kannan limai maitsü asoshi Tsüngremi shiadoker liasü. Tetezü pa mali ser Israel nungertem ano tenangzükba lima matong tashi jajatsü. Idangji, Israel nungertemi Sinai tenem nung Tsüngremi parnok den jembiba amadok nungbo ta Mosai kanga shisabolua bilem. Ibayongji, pai par nübortem dang Tsüngrem shibai parnok Egypt nung alar tia nung aliba nungi anitet Pa mamatsü aser Pa dak alema tanga tsüngrem shinga mekülemtsü asoshi nenshipet nenshia metetdaktsü. Item tekümdangtsü o tem rongnung Tazüngkunem tapu 4 tekong 24 nung ” Nenok Tsüngremji tesamatsüba mi aser tenükmiba Tsüngrem lir,” ta shia alibaji tetsübutsü, tekümdangtsü aser tepelatsü o tulutiba ka asütsü. Tir Yimyimi adokba Ao Orthography ‘Tetsümeli’ nung Tenükmeyiba tetezü Taginütsü, Tenükshitsü, jangratemtsü ta shia angutsü. Asenoki Mosai Israel nungertem dang parnok Tsüngremji tenükmeyiba Tsüngrem ta ashibaji angatettsü merangra, Tsüngremi asenok kanga nükshia aser aginüa repranger ta angatet nung junger. Asenok asoshi teimla, tejenokdak aser tepelatsü osangji aji lir. Ajisüaka, ano külen Tsüngremji tetsübutsü Tsüngrem, kechiyong mi agi yimti aut küma samatsüba ama Pai meimchirtemjia samatsütsü akok. Atangji, Tsüngrem temeimjia mi ama tashi tulu, anungji mi agi temenen lima mali küma meshimeshia samatsüba ama asen taküm nung temenen alibatema mali küma pai meimnür. Aji oda, mi agi samatsüba ama asenok samatsü asü (?) mesüra mi agi temenen rongdoktsüba ama asen taküm ajunga Tsüngremi agitsüsa asenok alitsü (?), ibaji asenoki shimtettsü. Aji oda, Tsüngremi asenok kanga meimer asünungji Pai asenok ya temenen nem memesüzükdaktsüner. Iba jagi asenoki Pa toktsür tangar den senzüdang Pai tenük kanga merema repranger. Iba tashiji pai asen taküm aser tanüla apayur aser mesamadaktsüner. AsenokI Tsüngremi ashi manga temenen nung jajaba ajanga takoksa aser tesama ajurutsübaji Pai meteta lir. Ibayongji asenoki tashi mangayongbo Pai atasar aser asenok temenen den jajabaji tenükmerema Pa dangi meyipa maru tashi repranga atar. Iba tashiji asenoki külemba Tsüngremi asenok meimer. Atangji, tanü ama alima rongsen aser japujari mapatem jateta adokba putu nung asenok Tsüngrem nungi pilatsüsa temenen tatidang agi meketbanga lir. Aji oda, yimten nung jenjang ka alangtetnü dang, ali rongsen tilaka ajangzüknü dang mesüra shi azü tera jangratemnüdang asenok Tsüngrem den tesendaktep raksadoktsüa akok. Iba ama mapang asenoki asen Tsüngremji tesamatsüba mi aser tenükmeyiba Tsüngrem lir ta bilemtettsüla.  Kechi tia nung lidir liaka Tsüngremi asenok ya tesamatsüba jenjang aser alar tia nungi anitet ta mamatsüla. Tsüngremibo asenok dak teti temulung lemteta lir, kechiyong asenokji par chirtem lir. Mark 12:30 nung ashir, asenok temulung ajak agi, asenok tanüla ajak agi, asenok mulungsentsü ajak agi aser asenok tashi ajak agi asenoki asen Tsüngrem meimtsüla. Tetezü, asenoki asen Tsüngrem meimba temeimji asen aolen ajak nung aser aseni inyakba mapa ajak nung sayutettsüla. Iba amaji lidaktsünüa Tsüngremi teti asen taküm ya tenükmeyia reprangdagi ta bilema kümdanga jajadi aser tasü itta bilemdi.