Tenüng asangba kongki ka – T. Ken 150: 1-6

Laishiba nung ken kaket Tenüngsang Kenji lir aser ken züluri tatem tenüng asangba aser tekülem indang asenoki metettsü Tsüngremi aginer ta tatsü agi jangjatsür. Khristan tamangji ken atenba aser tetushi agütsüba tamang lir. Asenok akaba ama tanga tammangba yimsü nung tenüng asangba aser ken atenba mali, kechiaser asenok mulungjang nung asenok Kibuba ken kar. Ken züluri iba ken nung tasüngdangba kar langzür.
Asenoki asangbaji shiba? “Kibuba sangang” (t.1) – arogo masü, sayutsüngir masü saka Kibuba. Asenok tebilemtsüji asenoki aiben Kibuba mangur. Asenoki Tsüngrem nungi sempet anguba mesüra manguba repranger. Asenoki ashir, “Kechiba Kibubai ya meinyak, mesüra kechiba ibai balaka inyak?” Asenoki Pa shidakba mangur. Asenoki sempetji atema tagütsür dangi odi. Asenoki temoatsüji atema moatsüsang dangi odi. Asenoki Kibuba sangdi. “Teti Kibuba nung pelaang; tanabena ni shiti, pelaang!” (Filipi 4:4).
Asenoki Pa kong asangtsü? “Pa temeshidak Tsüngrem sangang, anüng ali tsüngda nung Pa ain asoshi tenüng sangang” (t.1). Koda jangratemtsü teloktep ka. Kodang asenoki tenla kidang Tsüngrem tenüng sangdir, ibai kotak nung tenyartemi tenüng asangba ama lir. Tekülemdak mesüra kechi nungsa asenok lidir, asenoki Tsüngrem tenüng sangdi.
Kechiba asenoki Pa tenüng asangtsüla? “Pa tashi tulu mapa asoshi Pa sangang: Pa kanga uluba asoshi Pa sangang” (t.2). Pa kechi aser Pai kechi inyak iba asoshi asenoki Pa tenüng asanger. Asenoki Pa koda asangtsü? Jangzü ola agi, tzürang kongki aser tawaba kongki agi, asem atemba agi, tsüngsangba agi, lisü aser jemji kongki agi Pa sangang. Ken züluri ashir, “Kongki ajak bendenang. Nai akok tashi kongki bendenang aser asenoki Kibuba sangdi”. Kari ibaji maginür, saka asenok dang Pa ola tulu agi külemtsü ozüng agütsü.
Tanü yimya ajaki Kibuba tenüng asanger saka nüburi Pa amadoker. Ne sasa ken 150 nung tenüng asangba indang asüngdangang aser ken züluri langzüba shisadangang. Nai aika nung tenüng asangtsü kar. Pa tenüng asangba ajanga Tsüngrem mulungjang nung tepela bener arujang.