Tenüng atema semzükba

Asenok rongnung nisung karibo kiojen mesüra lenmang mesüra langka tasen ka lapokba dang semzük ta ajatsübaji mapet amai bilemer, ibayongji taoba mapang ka asenok rongnung iba indang kanga junga shisalemsatepogo. Atangji, aika atema semzükbaji tula longpant mesüra korang semzükba ama dang dang ajar amai bilemer. Ajia shitak, saka ano aikati semzükba ya tula longpant semzükba dang masü saka kiojen tasen mesemtetba mesüra lenmang tasen yanglur lapokba mapa danga semzük ta ajar asünungji tanüa Nagaland nung state government-i kiojen semzüka toktsüba indang yangi tebilemtsü kar lemsatepner. Aji oda, Engraji nung ‘inaugurate’ ta asüba ya Ao nung lapok ta asüba dang nungibo semzük ta asübajiang tapetba aser tajungba amai bilemer. Atangji, tanü yimobilem nung ya ‘semzük’ ta amshinüba agi oki alar dang ashi, shitakba tazüngertem den lemsatepnüba tebilemtsü onükjibo Nagaland nung state government-i semzüker yutsüba ki aser lenmang aika lir saka item semzüker yutsüba dak alaka ki aser lenmangji anepalu masür, anungji arem kümdaktsüba takoksa aser tezüdangtsü mapatem indang lemsatepner. Aji oda, taoba Hokolbar nü Nagaland angh P.B.Acharyai Longwa semdangba mapang yangji ‘International Trade Center’ nung shishilembarbo shinga mali saka iba shishilembaba ki agi kiset shirurutem mejangba ki kümer anguba osangji asenok asoshibo kecha balaka masütsüa akok saka pa atemabo taoksatsüka liasü. Ashiko, International Trade Center asünungji, pabo yangji Mynmar nungi bener adokba oset karbo alitsü südi ta bilema orr alitsü. Ajisüaka, International Trade Center nung kiset shirurutemang mejanga alibaji, atangji, taoksatsüka aser taaktsüka lir. Koba ki mesüra lenmang südir süang semzükbaji tatembang masü saka tetenzüker lir. Aji oda, Longwa yim yabo India aser Myanmar na yimdong agidang artsüdanger asünungji alima kintem adenshia shishilembadak lapoktsübaji tesem tapet aser tajung ka lir. Iba tangatetba nung 2006 küm Longwa nung ITC ya semzük südi. Ashiko, iba anogo nung iba ITC semzüktsüri iba anogo nungisa India aser Myanmar na tsüngda yangji chiyongtsü, osettsüset aser süoshi tapu balala bener arua shishilembatsü amato jembir asütsü südi. Aji oda, alima balala nungi shishilembartem ajurutepa parnok tsüngda shishilembatsü lenmang balala lapoka inyakba tesem ka asütsü asoshi mangdang tulu yur iba ITC ya lapoker asütsü. Ajisüaka, tangarjibo yutsür, iba ITC lapoktsür yimsüsür aser tulurtem jagi iba shishilembadaki shishilembartem arutsü indangbo kecha mebilem südi. Aji oda, tang tashi Myanmar nungi Longwa tashi gari lenmangbo yutsür tetsüng lenmanga junga mali, anungji jangotsü terara ayokba aser alibaji tekolak nung bener jajar. Ano, tesüngmangtsükaji Myanmar len nungi aruba lenmangjibo yutsür, India küboka Assam nungi Longwa leni atuba lenmangji lenmang memesük ayong amai kümer angutsü. Külen lenmang mali aser külen lenmang kenyongi majung ta yutsür asenoki International Trade Center lapokba kolok aser tangatetbaji kechi (?) ta bilemer. Kechi mapa südir süang, alima junga renloktsü aser nübortem anisüngzüka alitsübaji sentong yanglurtemi yangluba sentong dak dang keta lir. Aji oda, tanü Nagaland nung sentong yanglurtemi yangluba sentongtem yabo asüng lanurtem meraketa alitsü atema yangluba sentongtem masü. Tang aritepa kiojen mashimashi yanglutsü aser aritepa semzüker yutsütsü, ibaji tajangzük lia amshir asü masü ta asüba khuret kecha mali, saka government meyong kiojen aser lenmang yanglu dang pei asoshi sen terabo angur asü mangur ta kisüng bilema anogo shia mapa kabosa tenzüktsü mesüra semzüktsü ariteper. Ibayongji, tanü Nagaland nung government indang kiojen semzüker takidak maka tejen küma shizüka aoba tesem aika nung angutsü. Pei nüng aser sen agitsü asoshi bilema government nung alirtemi terenlok mapa inyaktsü memerangtsüla saka nübortem asoshi kechi nüngdak, aji bilema kanga nendaka inyaktsütsüla aser semzüker külena teyanglu langa amshitsüsa kanga junga anepalutsüla. Koma semzük ta masü saka koma amshidar ta asübaji dang nübortem asoshibo tagitsü, tachitsü aser tajemtsü asütsü.