Tenüng menüktsüba atema M J Akbar-i Priya anema ken o benok

New Delhi, Mongputeni/October 15 (Agencies): Tawa India nung #MeToo campaign tenzükba sülen journalist Priya Ramani-i, Union minister M J Akbar-i la dak tim mesüi benshiogo, ta tai tongloktsüba nung ajemdaker tanü pai Priya-i pa tenüng menüktsüba atema ken o ka benokogo.
Minister of State for External Affairs, Akbar-i, Priya Ramani-i metetsümonga tebilemba tamajung nung pa tenüng menüktsüogo, ta shia tenüng menüktsüba ozüngtem nung ajemdaker la anema ken o akatsü atema benokogo.
“Ken o agütsüsang (Akbar) mapang talangka journalism nung ajemoker inyaka liasü, pa India nung mezüng hopta shia adokba yimtenren osang Magazine adoka liasü,” ta shia social media ajanga Priya-i pa nüng menüktsüba indang shia lir.
Advocate Sandeep Kapur-i file asüba nungji Indian Penal Code (IPC) kübok Arrla 499 nung ajemdaker Priya nem notice agutsütsü mepishia lir.
IPC kübok Arrla 500 nung, iba ken o nung aitsüra küm ana tepoukdak ayutsü mesüra senchi achitsüa akok, mesüra temerenshi anapronglaji agütsütsüa akok.
Africa kübok Nigeria nungi meyipa aruba sülen Union Minister, Akbar-i, tetsür aikati pa nem tai tonglokja alibaji yazü, anungji parnok anema legal ajanga tim inyaktsü, ta metetdakja liasü.
Tamalen Akbar-i parnok dak tim mesüi benshiogo, ta pa nem tai tonglokja alir rongnung Priya Ramani den Ghazala Wahab, Shuma Raha, Anju Bharti aser Shutapa Paul nunger densema lir.