Tenüng Sangang -T.Ken 103:1-5

Kibuba dang kecha masüngdangi asenoki kobika jembitsü ni memetet. “O kü nela, Kibuba moajang; aser kü dak aliba ajak agi pa temeshi tenüng moajang. O kü nela, Kibuba moajang, aser Pa teyaritem tamadok” (t.1,2). T.Ken 103 nung tasüngdangba kecha mali. Iba nung tenüng asangba dang lir; Dawidi Kibuba moatsü.
Dawidi kechi temoatsütem asoshi iba ken aten? Itemji asenoki amadokbatem asütsü akok mesüra teti asoshi agüjadokba ta bilema alitsü akok. Mezüngbuba, Kibubai kümzüker. “Shibai ne tai ajak atoker; shibai ne tashidak ajak anebtsür” (t.3). Pai ne aibelen ajak adoker kasa lenmang nung Pai meimchir temang anebtsür. Aiben Laishibai temenenji shirangba den medemdanga zülu, aser tekümtetji anema aliba den medemdang. Tsüngremi asenok tanela kümzüka anema yutsür.
Tanabuba, Pai wazüka ayur. “Shibai ne taküm kangla nungi alangzüker; shibai temeim aser taochi agi ne nem korang semtsür” (t.4). Pai teraksatsüba ajak nungi asenok wazüka kümzüka ayur. Pai asen kolak nung chuba korang semtsür aser chuba kümdaktsür.
Tasembuba, Pai tiptemdaktsür. “Shibai tajung agi na jangraba tiptemdaktsür” (t.5). Dawidi ashir, Tsüngrem asenok mongzü ama lanuwa tasen kümshidakja asenok tiptemdaktsür. Mongzü tezüngtem melener, tezüng tejentem indoker, tasen agi melener aser tanaben yima aor.
Tsüngrem tenüng dang asangtsü nai sarasademer asü ? Nai Pa tenüng asangtsü aika lir, kechiaser tanen maka na meimer. Kümzüker, tiptemdaktsür, wazüka ayur. Ken tenüngsang agütsübaji teperi masü; teti Pa tenüng asangba nung mapang agiang.