Tenüng tajung aginüba lima; tetezü tenüngsang aginüba lima nung asenok alir ta angatetdi

~ R.Imkong Lkr, 4th Mile, Diphupar, Dimapur.

Tanü lima ya temeyoktep aliba lima ka nung asenok lidagi, yamaji tanü lima ya tulur aser takar, sensaker aser timtemer lima ka nung asenok lidagi. Item rongnung karibo timtem tushi jenti arema nüburtem asoshi mapa tajung aika inyaker, aser parnok jagi pei ajungtsü atema kangabo mebilemer, kechiyong parnok jagi alima timtem tekangshi ya angateta lir. Parnok jagi alimaji tang junga lirbo paa idakji dena lir ta angateter, parnok jagi nüngsen kumen ya khen agi mesükshir, aser item jagi kodanga sü-o-shi tajungtema mesübur, kechiyong sü-o-shi tajung agiba jagi parnok jangramatemer mesüra chiyungtsü tajung talubusa chiyungba agi parnok temulung maleter, tetezü parnok temulung masü. Aser parnok jagi akümlitang ki tajung nung lia rongsen jenti akabaji khen agi menükshir, saka pa mesüra la tetsü pok nungi alimai arudang kecha bener maru, saka mangsa alimai aru, aser ano sür külena mangsasa aotsü ta kanga junga rajema meteta kar. Iba o ya Yob-i ashiba o tu kanga mesükteper ta angateter. Yob tapu 1:21 nungji angutsü. Iba lima nung karibo ki tajung süa yanglua ayur, saka parnok kodang südir pai mesüra lai kecha bener aotsü makar. Saka karibo parnok akümlitang ambang yima mero-meroa ali rongsen jenti bendena ayur aser achi ajemtsüa mola moashia yur jangratema litepdang karbo tanep aser taonung sürchioka chiyungtsüa maka timatemer. Anungji shirnok dak “civics sense” tangatet-tsü shisatsü tajung keta ali item purtem jagi tang pei limaji yanglutsü aser tangartem shirnok tajemzükba tia nung lir, itemjia junga lidaktsütsü bilema meranger. Yamaji itempurtem jagi tang alima nung timtema aliba purtem atemaji kanga shi-shia bilemtsür. Ni ashitsü agibo item amala nüburtem jagi tang kodakia “Heaven” otet-tsü ta tamang akar. Kechiba ta süra tanü lima nung Arogo aikasa lir aser tamanger-tema aikasa lir, saka mapa medeni mesüra temeim medeni tebang tesa agi tamanger tajung ka ka ta züngshibaji Tsüngrem tsüngdangbo tagizüktet-tsü masütsüa akok ta nibo bilemer. Aser ano tanga olen ka nung alima sangertem ajaki tenüngsang ola ya kanga anganer, hau ni, karibo pei kisüng ajungtsü tu yutsür tangar nisungtem timtema aliba purtem tu lemang aisü nung yarir, tatishitsü agi ali rongsen agi süale, nübu tsük agi süale, alima shisatsü agi süale timtema aliba purtem aria bilemtsüa yariba purtem nemji tenüngsang agütsütsübaji kanga tetemsü ta shisemer. Yamaji tajunger dang tajung ta ashitsüla, aser tamajunger dang tamajung ta indang indanga shitet-tsüla. Aser ano tanü tensa mapang nung Arogo nung süale, yimten tsütsülen süale karibo tenla tululu agütsür, saka iba agütsüba tenla ya pei ket nung rongsen mola moshia akartemi agütsübajia junger ko, saka talisa pei ket nung ata mata tang liakasa telong tang jungerbo mesüra Arogo-ji tang jungerbo ta ser tenla tajung agütsübaji nisungtem nungi tenüngsang tetushi agüsütsübaji kanga tang tetemsü ta shiteter, aser teyanglur Tsüngremia ibaji aginer ta shiteter.
Yamaji asen lima nung Minister-tem aser MLA-temi anir tulur aser takartemi lokti ajak nung tenla tenji tululu agütsüba ya ola madokibo meliteter, aser iba ama tenla tenji agütsür nemji tenüngsang agütsübaji ajaki pelaa agizüker. Yamaji Arogo nunga Pastorba aser Pastornila-i anir tenzüker aikati mapa tajung inyakba atema tenüngsang tetushi agütsüba ya aginer, aser iba tenüngsang agütsübji angashia ano tali dang tajungba inyaktsüji jangrar. Yamaji Tsüngremia tenüngsang agütsübaji aginer ta temeshi laishiba ajanga angur. T.Ken 105:1,2 nungji shia angur. Iba tenüngsang agütsüba ya temeshi laishiba dak ajemdaker lemsateper. Kanga pelar.