Tenüngsang Agütsüba Anogo (Thanks Giving Day)

– Dr. C. Tarep. Dimapur.

Okila: – Tsüngrem metetertem asoshi kechisarena nung Tsüngrem nem teti tenüngsang agütsübaji tim aser tetemsü. Eg: Efesa 5:19:20 etc..
1621 Mezüng tenüngsang agütsüba kimong
Mr. Columbus-i America ngutet, iba sülen European linük balala nungi America-i aruagi pei-pei lushi aser yimti lepteta yanglu; Saka America Lepo Impur Jibo Red Indians nunger liasü. Tesü arurtemji semloka alirtem (Ainer) liasü. Red Indians aser semloka alirtem tsüngda yokyasonü asoshi aiben raratepa tsükchiteba liasü.
Virginia Company (London) 1607 küm America nung alitsü tenzük.
England nungi tamangba yimsü metsünga-reta (purist) amanger telok ka America-i ao. Parnok dangji temeshi ainlen senzür (pilgrims) ta aja. Parnok America nung Plymouth, Colombia, Massachusetts, Puerto-Rico etc nung yimti kümteta liasü. Parnok America-i arur 1621 tejaklen alu aser atsüki nung tsük aser süngjanglijang chitongshia maruh, kanga susaa ukrong. Tia kaa 1621 kümbo ali-e pei tejang molamoshia tangtsü. Parnoki Tsüngrem dang kanga pela aser iba yabo Tsüngrem nem alakteta tenüngsang, sarasadem aser Neburtem den pelatepba Benjong chiyonga amongtsü retreat agizük. Plymouth nung Governor William Bradford-i anir par Arogo aser linük nung tenüngsang agütsüba anogoji retreat asemnü among. Iba anogo nung temaitsü chiyongtsütem : Arem Turkey, Mesü shi, aser Murh mapu chiyongtsütem amshi (Wild Turkey, Vinison and Pumpkin pie etc…) Parnok nguyutepba mapang nungji par kiyonger Red Indians nunger den züngzünga chiyonga pelatep.
Iba jilu yimya tajungji USA nung prokshi. Saka iba Benjongmongji aiben züba-züba süidaktsü. Saka 1789 küm USA Tir George Washington yimsü asüba mapang tenüngsang agütsüba anogo ya par tamangba yimsü aser linük inyakyim nung ajaki amongtsüla ta sangdong. Anungji tenüngsang agütsüba anogoji par kin (National) aser tamangba yimsüi kümshia November ita tatembang buba Brihostibar nung amongtsü lemteter yamaji monga arur. (last Thurday of  November every year).
1863 National Holiday
USA nung tetsür mongin tezülur ka tenüng agi Sarah J. Hale-i anir Thanks Giving anogoji USA ajunga nung Office shibanger temba adianutem nguyutepba Tsüngrem tenüng sanga sarasadem aser Benjung monga adianutem den lemsatepa anogo asütsüla ta lai tongti shilem agia jembi. Tatem nung Abraham Lincoln USA Tir asüba mapang USA hohoi onükji agizük aser 1863 küm nungi National Thanks Giving Day-ji National Holiday akümtsü sangdong aser tanü tashi yamaji monga arur. USA Tir alidak (White House) nungi anir kibok balala nung iba anogo ya kanga longsoa tetezü tulu keta tanü tashi mongteper.
MELEPZÜNG
Tanü asüng Town nung alirtemi alu mayimer, saka küm piyong inyakyim mesüra wadang balala nungi anogo sen/ita sen angur. Pei atsüki nung süngjang lijang mesüra shiruru metsü menu inyakyim balala nungi küm piyonga Tsüngremi agütsüba temoatsü molamoshia angur. Anungji alu nungi mesüaka pei wadang raren nungi Tsüngrem nem tenüngsang agütsütsü tim aser tetemsü lir. Tenüngsang agütsüba anogo tetenzüker nükjidong aser mangdang jilu yia inyakbaji tobur tajung lir. Mezüng lenir-i sayuba inyakyimji aibelena mesüi jilu ajia inyaktsüla. Arogo aser yim Fellowship balala-i tenüngsang agütsüba anogoji kenkenbo rongsen dak rangloker inyakba angur. Rongsen arentsü asoshi sales day aser Thanks Giving anogoji tetsüngda tulu lir aser aji aibelen mesüi Tsüngrem nem tenüngsang agütsüba, sarasadem aser neburtemden pelatepa chiyongtepba aser tembar adianutem den nguyutepba mamali. Asenoki Tsüngrem kidang tenüngsang agüja sentong akhümketa yanglur tenüngsang sentep akar. Iba den metenloka pei kidang tembartem den pelateba chiyongtepba jia mamali ta ayongzüker.