Tenüngsang agütsüba

Khristan purtem atema taküm arishi aser nüngdakba rongsen ajak angudak lenmangji Tsüngrem nem tenüngsang agütsüba ya ka lir. Alima nung alir takar aser tulurtema tenüngsang angudang pelar aser peladangbo sensaker aser tilartem nem memeshidangyongi teyari tulu agütsür. Iba amaji asenoki Tsüngrem nem tenüngsang agütsüdang Tsüngrema pelar aser kodang asenoki Tsüngrem peladaktsüdir, asenoki memeshidangyongi Pai asenok moatsür. Khristan taküm ka atema jangratemtsüji ibaji asütsü. Asenoki sen teraka angutsü atema anogo piyong belemseta inyaker saka Tsüngrem nungi temoatsü angutsübajibo melamelar kechiyong asenoki Pa nem tenüngsang dang agütsü nung pai asenok moatsür. Tenüngsang agütsüba mulungjangji Tsüngremi aginer. Tsüngremer temoatsüji anogo shia asenok inyaksangshiba nungi angur. Asenok shisabolua timtema alidang tembar, kiyonger mesüra kinünger kar nungi o tajung ka agi asenok mulung süneptsür, lenmang sayur aser teyari agütsür. Khenkhenbo memetetba lenmang aser memetetba  nisung nungi asenok teyari angur. Asenok aneper aser asenok mulung anisüngzüker. Item ajakji Tsüngrem nungi anguba temoatsütem alitsü. Kenü anogo zütsüra aketba nisung ter-i Yisu ajuru aser parnoki ola adoka Pa dang taneptsü taochi meshi. Idangji Yisui parnok dang parnoksasa oa parnok temangji purtirtem dang sayutsü ashi. Anungji, parnoki tashi angaa putirtem dangi aoba mapang, len tom nung parnokji anepadok. Kodang parnok nisung ter rongnung kati pa dak zütsüra adoka aliba to anepogo ta metet, idangji pai Yisu tonga oagi Pa tsüngdang aputaka tenüngsang agütsütsü bilemtet. Paji Samaria nunger ka liasü. Idangji, Yisui pa dang asüngdang, ni nenok ter aneptsü masü no ? Tukubo kong ali ? Iba bendanger nisung ka dak alaka Tsüngrem tenüng asangtsü meyipa arur shinga mali no ? Iba otsü ya asenoki Luke  tapu 17 nung shia angur. Yihuda nunger asoshi zütsüra tashidakji tesempatsü aser tashipangtsü tashidak ka liasü. Item zütsüra aketertem to pei yimtak aser pei kidang pei kinüngertem den alitsü mekoki aliba mapang ka parnoki Yisu ajuru aser parnoki meshiba ama parnok nem Yisui taneptsü taochi agütsü. Ajisüaka, Samaria nunger ka dak alaka par tukui parnok anepba asoshi Tsüngrem nem tenüngsang agütsütsü mebilemtet mesüra mapang magütsütet südi. Parnok pei kinüngertem dena melitettsüsa aliba tashidak ka ajungbena ka anep nungji pelakanger parnok tukuprongla to Yisu alidak masü pei yim, pei ki aser pei kinüngertem ajurua matateti aritepa ao südi ta bilemer. Aiben asenok timtem aser nüngdak nung Tsüngrem dang meshia sarasademer. Iba amaji Tsüngremi asenok nem takok agütsür, jala jabaso moatsür, tashidak aneptsür. Alu nung metsü prokdang temoatsü meshia sarasademer proker saka alu rozükerbo Tsüngrem nem tenüngsang agütsütsü amadoker. Tsüngrem dang mapa meshia sarasademer saka mapa ngurbo asenoki Tsüngrem amadoker. Paibo asenok moatsüogo, asenok aneptsüogo aser asenok nem takok agütsüogo saka asenokiang Pa nem tenüngsang magütsüteter. Tenüngsang ken 121 nung ashir, kü teyari ajak Tsüngrem nungi arur.  Aji oda, kechisarina ajak nung asenoki Tsüngrem nem tenüngsang agütsütsü mamali.Kodang asenoki Tsüngrem nem tenüngsang agütsüdir, idangjiang ano asenok temoatsü tuluba angur. Filipi 4 nung ashir, kecha nunga temulung tadem, saka nenoki tenüngsang agütsüba agi nenoki mepishiba Tsüngrem nem metetdakjang. Zütsüra aneptsür tukutobo kong lir ta asüngdangba ama, asenoka kong lir ta Yisui masüngdangtsüsa asenok mulungjang tenüngsang agütsüba agi sünga alitsübaji kanga tongtibang lir.