Tenüngsang agütsüteptsüla

Nisung mulung peladaktsüba olong temela ana lir, ibaji ka tajung dang “Junger” ta ashiba aser kaji tajung inyakdang ‘kanga pelar’ ta ashiba olongtem asütsü. Iba kasaji nisung mulungjang melamelaa jashidaktsübaji tajung dang junger ta mashiba aser tajung inyaktsüaka kanga pelar ta meshitetba jakla aser shisatsü asütsü. Item ajakji awashi nung dena lir. Aji oda, awashi metetba ya temoatsü apokdak aser awashi memetetbaji temoatsü tepdokdak asütsü. Atangji, nisung shia shisatsü kasa masü, kari tangar dak tajung dang reprangtetter saka karibo tamajung dang reprangtetter. Aji oda, nisung ka dak tajung aser tamajung na prongla keta lir, anungji nai koba tsütsü reprangdir, iba amaji nai reprangtettsü. Glass marok ka nung tzü tom tashi enoker yutsü nung, ibaji kari marok tom tashiji tzü agi sünga angutsü saka ano karibo marok tom ka tzü agi masüng angutsü. Tetezü, kari sünga aliba tsütsü repranger saka karibo masüng aliba tsütsü dang repranger. Anungji, anapronglaji shitak, saka tena dak aketba shisatsüji koba tajungba asütsüar asenokia angatetter. Atangji, yimten nung telok balala tsüngda tajung inyakyonga tenüngsang magütsütepi aitsütepbaji balaka kechiyong opposition teloki sorkar nung alirtem aija anidaktsübaji parnok mapa lir. Ajisüaka, asenok kibong, lokti aser arogo nungbo kati ka tenüngsangtepa, tajung inyakdangbo junger, kanga pelar ta menungnangi ashitsübaji kanga tongtibang aser nüngdak mapa ka inyaker ama bilema ashitsüla. Aiben kibong nung timtem aser rarabangsen adokba, arogo aser lokti tashi maitba timtemji tuluka nungi masü saka apuani na tsüngda tenüngsang magütsütepba, nübortemi lenirtem nem tenüngsang magütsütetba aser lenirtemia nübortem dang junger ta meshitetba ajanga adoker. Asenok aikati junga inyak tashi ola madoktsü saka majung inyakdang dang ola adoker, iba jagi mepelatep adoker. Iba amaji, asenok aikati akümlidangbo tsürabur o tanur na tsüngda tenüngsangtepa malir, apuani na tsüngda temeimbo meimer ser nung ‘ni na meimer’ ‘ nai inyakba ya junger’ ta tebang agi meshitetter. Tsüraburtemia tanurtemi tajung inyakdang temulung nungbo kanga pelaa bilemer ser nung tebang agi ‘kanga pelar’ ta meshitetter. Aji oda, tanurtemi tajung inyaknübo ola madoktsü saka majung inyaknüdang merenshitsü ta asüba agi tanurtem aika taküm raksaba asenoki angutsü. Iba kasaji tanurtemia tsüraburtem dang pelar ser nung tebang agi pelar ta meshitet alima nungi piladaktsüba aika alitsü. Iba amaji asenok akümli nung junga aliba mapang tenüngsangtepa pelatepa alitsü melen asenoki o tajung jembitsü koruba agi tsürabur mesüra tanurtem aika dang pelar ta meshijung alima nungi piladaktsüba otsü lir. Ibayongji, asenoki asüpila sentep nung nisung aikati pei apuani, pei tsürabur, pei tanurtem aser medemertem ajungba indang shirmeshima jembiba angashitsü. Itemji tesasaba ola ka dang akümer, kechiyong mangjak nung o tajung aika jembiyonga tasümangi kecha mangashitsü. Akumlirtem shisamakaba mapa kaji aji asütsü. Kinunger rongnung asüyonga, pi den asüyonga tajung inyakdang ‘Junger’ ta shia tenüngsang agütsütsübaji sen agi alitsüla jenjang tasak mapa ka masü. Ibaji angati anguba aser jenjang makaba senti oset ka amai lir. Iba jagi kibong aser lokti topur junga indaktsür. Aji oda, shiba südir süang, tajung dang junger ta shia tenüngsang agütsütsübaji pa mesüra la taküm alidang ashitsüla. Atangji, nisung shiba südir süang tabensabo masütsü, kechiyong nisungji mekomein agi sünga lir. Ajisüaka, asenoki tamajung reprangtetba tashi metongshiteper, tajung reprangtetba tashi tebang agi junger ta kati ka sangtepa alitsü merangra, iba jagi kija aser kibong taküm tajungba küma litettsü. Tanü nungibo asenoki pi dak tamajung-tamajung dang reprangteta lira, meyiper tajung tajung reprangtettsü merangdi aser tangari tajung inyakba nung tenüngsang magütsüteti lira, ibaji asen sentsüh tuluka atsüh amai bilema tenüngsang agütsüdi.Aseni tangar dang junger ta ashiba agi asen tajungba akümer aser tangar dang pelar ta ashiba agi asenang tepelaba akümtsü.