Tenüngsang masü taidok meshiba !

Nagaland nung election temer külen tesem aika nung, talisa, election nung takok angurtemi tenüngsang agütsüba sentong ayongzüka akaba angashir. Atangji, Nagaland general election nung takok angubaji atamata takok masü. Iba takokji timtem lendong aser shisabolu aika kokteter akokba takok lir, anungji Tsüngrem aser nisung nem tenüngsang agütsütsü tim. Ajisüaka, asenoki asen lima nung election agiba yimya indang jungjunga bilemdangra, ashiko asenoki Tsüngrem nem tenüngsang agütsüyonga Pai magizüktsüa akok, kechiyong election nung asenok shingaia Pa pelatsüsa meinyaktetter. Election nung takok angutsü asoshi candidate-temi sen, yi aser injang-bomb amshir. Candidate shibai election nung sen agi vote malilir, lanurtem yi jemdaktsür meraratepdaktsülir aser nübortem tsübudakja prangpong injang mamshilir, pa mesüra lajibo election-i mai tajungba ta asenoki jembir. Tanü tensa Nagaland nung iba ama election nung toktepertem yabo tamashi purtem rongnunga kanga tamashipurtem asütsü ta aikati bilemer. Ibaji kanga shitak saka yimten nung yimsüsürtem alitsübaji nüngdaker asünungji, mapang tongerbo shimtsüsa adoker aser itemji shimdang, asenok tia majung, asenoki tashiyim aser ochimashi len nungi shimtsü merangteper. Iba taiji tangar dak masü asenok dak lir, anungji election temer külen election nung adokertema mesüra madokertema Tsüngrem dang Taidok Meshiba sentep sentong ayongzüka akatsüba dak alaka Tsüngrem nem tenüngsang agütsüba sentep sentongbo ayongzüka akatsü menüngdaker ta bilemer. Asenokibo Tsüngrem anema, Tsüngrem anema dang inyaker külen tesüsa Tsüngrem nem tenüngsang agütsüba jagi, ashiko, Tsüngrem pelatsü masü ainang adoktsü südi. Ano külen, nübortemi election nung shilem agibatem bilemdangra, kar dak alaka, teimbaka senyong mesüra mapayong pei vote ayokba mapatemji Nagaland election otsü lir. Shingaia election mapang asen lima nung sen meindoki taneptsü angutsü, kaketshisatsü tajung angutsü, light khena metitemi shitak arutsü, tzü tajung peria angutsü, mopong memenendaktsütsüsa sentong tajung yanglutsü, lenmang tajung nung jajatsü aser lanurtem pei tashi aser sempet yari mazüngi mapa inyakdak angutsü mapatem asoshibo tebilema mebilemer, anungji mejembir. Election mapang shinga bang nungia asüng asen lima tajungba küma yanglutsü asoshi shisa tasen ka agüja jembibabo mangashitsü, saka election mapang jembiba o ajunga agi sen aser sen otsü dang angashitsü. Iba jagi sen amshitsüsa adoker aser iba jagi election temer külen madokertembo yutsür tadokertemang shisa tebuluba bulua sentsüh aotsü indang bilemer. Iba ama election ka agiba sülen tenüngsang agütsüba sentep sentong ayongzüka nübortem nem tenüngsang agütsütsübajia aikati temulung ajak agibo magizüktettsü südi ta bilemer. Atangji kechikomaka toktepdir toktepaka, takok angu nungji tenüngsang agütsütsübaji tim. Ajisüaka, takokji tashiyim agi anguba takok mesüra sen agi alizükba takok süra asenoki Tsüngrem aser nisung nem agütsüba tenüngsangji  taila tenüngsang asütsü. Ashiko, nisungibo pei mapa dak malangyonga tangar nungi tenüngsang angutsü imlatsü akok saka Tsüngremibo tenüngsang o mesüra tenüngsang tenla masü saka tashi angaba dang aginür. Takok aginüdang Tsüngremi ashibabo kata mangai inyak saka takok ngur külen Pa nem tenüngsang agütsü ta asüba mapa jagi Tsüngrem akümtsübur asü (?), Tsüngrem mezüngmeshir (?), asenoki khen jungjunga bilemdangdi. Asenoki shitakba melenshidi süra aser shitakba asenoki tarutsü asen lima aser lanurtem meimra, tenüngsang agütsüba sentep sentong ya masü, taidok meshiba sentongang ayongzüka among tajungba asütsü. Iba sülenang tenüngsangteptsüsa adoktsü !