Tenzükba ajanga tenüng asangba (T. Ken 100:2)

Tepela ola agi tepela tenzükba dangi anir. Asenoki Kibuba tepela agi tenzükdi süra asenok o mapa akümtsü. Yisui anemsü agi külemertem anema tekümdangtsü agütsü (Matt. 15:8). Asenoki Kibuba koda asüngteta külemtsü?
Mezüngbuba, asenoki mulunga tenzüktsüla. Tsüngremi kechi mulunger aji inyaktsü asenok alangzük. Iba tekong ya Tejen Lai nung Yihuda nunger asoshi tetezü akaba tekong ka liasü, kechiaser parnoki alar tiaji meteta liasü. Tsüngremi parnok Ejip alar lia Pa tenzüktsü asoshi alangzük.
Tanabuba, asenoki mejameja Kibuba tenzüktsüla. Asenoki Kibuba tanga mapa den meyoktepa tenzüktsü makok (Matt. 6;24; Anitet 20: 2,3). Saka asenoki Yisu asoshi tangar tenzüktsü akok. Asenok alizüngji Pa dang peladaktsütsübaji lir. Asenok taküm asoshi tashi, shisatsü aser sentong Pa nungi dang arur.
Tasembuba, pelaseta tenzüktsüla. Ken tamatokba chir o entepba otsü nung jabaso tambusang ama asenok akümer; asenoki Tebui mulungba mapa inyaktsü akok, saka asenok Pa mulungjang nungi talangka pilaa alir. Asenoki nemnema tenzükba mapaji Tsüngremi maginer. Iba jagi lidaktsür. Kodang asenoki Pa pelaseta tenzükdir aser ainer, renloker aser peladaktsür. Kibuba tenzükba nung na pelaa lir ma?
Asenok mapa ajanga asenoki Tsüngrem mapa küma tushir. Na arogo nung mesüra lokti nung Kibuba tenzükba nung dena lir asü? Kodang nai mulungsoa Kibuba mapa inyakdir, nai Pa sentsüwangshidaktsür. Tebang agi tenüng asangba mapa dangi na anidakjang.