Tenzüktsü Aja

Adianutem nüchiba asoshi nenok aja; saka iba nüchiba nenok shi inyaknelen inyaktsü asoshi dang tamshima, saka temeim agi medemer o medemer na tenzüktepang.
Galatia 5:13
Tenzüktsü ta asüba ya kechi? Khrista nungi tatishitsü agidi. Pai Kotak nung sentsüwangshi menden toktsür meimchir den alitsü asoshi alu, mezüngmeshi Pai aremzük, shirnoki Pa magizük parnokjia Pai meim, ajemalua Pai Pa nütsüngtem tetsüng shitoktsü. Tetsüng shitoktsüba mapa ya kiliri dang inyakba mapa ka liasü, Pa nütsüngtemi Pa toktsütsü ta Pai metetaka Pai parnok tenzük. Pai asenok asoshi taküm tenla agütsü.
Khrista sülen anitakertem asenokia Pa ama tenzüktsü asoshi aja. Medemer o medember na temeim agi tenzüktepa alitsü Pai mulungba.
Anungji, tenzüktsü asoshi mezüngbuba nung pei shi azü tasü akümtsüla. Idangji dang asenoki Khrista sentsüwangshidakja kati ka tenzüktepa litettsü. Tenzüktsü asoshi asenok aja, anungji temeim agi tenzüktepdi.
Sarasadem
Kibuba Yisu! Ne tsüngsü nung nia medemer den tenzüktepa alitsü, Ne temeim kü daka lidakjangma. Amen.