Tepela Sayuba

Pa süki nung tepela ola den tenla agütsütsü; Ni ken atentsü, au, ni Kibuba dang nüngsang ken atentsü. T. Ken 27:6.

Tepelaji Tsüngremer sempet rongnung ka lir. Pauli ashi, “Tsüngrem yimliji Tanela Temeshi nung tepela, tesünep aser temeshiba lir” (Rom 14:17). Kasa teyari pai züluba azüngertem asoshi sarasadem, “Tang nenok Tanela Temeshi ain nung teyimla agi asüngtsü asoshi, aser teyimla Tsüngremi tamangba nung tepela aser tesünep ajak agi nenok süangdakjang” (Rom 15:13). Tanela Temeshi süngjangji senti berem yinzü ama lir: “Temeim, tepela, tesünep, taremzük… ” (Gal. 5:27).

Khristan tepela poktetdakji Yisu Khrista shibai asenok tekümtet mapa renemtsür tasü nungi shia arur teti asoshi tenokdakdak takang nung asenok nem tepela agütsü. Tekümtet sempet agütsüba dak alaka, Tsüngremi tanga sempettema aika agütsü, aser item jagi asenok tepela aser tenüngsang akangdaktsür: tanur tasen asoba, shirangba nungi taneptsü anguba, school nung junga inyakba, mapa tajungba anguba, jangratema aliba, tembartem den ajurutepba. Item ajakji Tsüngrem nungi anguba tepelatem lir, asenok temetenji Tsüngrem tenüng asangtsüba dang lir. Tenüngsang Ken züluri: tenüngsang agütsüba tenla tepela ola den ken dena agütsü. Asenokia yamaji inyaktsüla.

Kibuba Yisu, Na jenjang agi melitetba onok rongsen lir, temerüktiba tepela, ochiba tembar. Tepela bener arutsüba asoshi onoki Ne tenüng asanger. Amen.