Tepelatiba Anogo

Kibong kümertem aika asoshi taküm nung tepelatiba anogoji kibong akümba anogo ya asütsü. Iba anogo ya pei danga taoba meimla aser meimsang den masü tashi külemi alitsü asoshi longjemba anogo lir. Ibai kiyimla aser kiyimsang asoshi pongmang asangsang nung atalokba anogo lir. Anungji, kinunger aser medemertem ajak jaoka pelateptsübaji tim dang lir. Ajisüaka, tang ama kibong kümtepba mapang kiyir benjong nung adentsü aodang kibong kümertem rongsen lalushipongba angudang kanga shisaboluja bilemer. Kiyir benjong nung chiyongtsü tapu meyina renembajibo toktsür kiyimsang aser kiyimla na sübotsü süoshi kija nung sen lakh dak tali endoker aser sü ki yangluba kija nung sen lakh aika endoker. Iba denji alima nung kin tapu balalai amshiba chiyongtsü ajak renema agütsütetter. Aji oda, kodang kibong akümtsü sentong atongdir, kiyimsang aser kiyimla na  ochimulung agi meimtepa alitsüsa parnok taküm aser temulungjang renemtsütsübato amadoker, kodaser tangar dang nungi tajungba jenjang nung kiyir benjong agütsütsü ta bilemba kija agi kibong metenzükdangyongi sensak tiai irr atar. Aji oda, asenoki jungjunga mebilemdangi kiyir benjong ayongzüka akaba yimya nung ya temelenshi nüngdak ta bilema alidang, ni osangkaket nung taküm küm August ita nung Turkey lima  aiür ka aser asangur ka kibong akümba yimya khenyongi balaka nung nung akümba ka züngshi, anungji tanübo ni iba tatalokba otsüji asenok den lemsatepner. Iba otsü azüngba ajanga asen lima nunga aiür asangur karibo kibong akümba yimya nung temelenshi tajung bener arutsü imlar. 2011 küm nungi Syria lima nung parnok o parnok na tsükchitepa ‘civil war’ adokba ajanga pei lima nung tetsübu agi tali majung Syria nunger nisung million pezü ( lakh 40) dak tali pei lima toktsür tanga bendang limatem bushia oa jenoka lir. Parnokji bendang lima nung talidak maka nemzürtem (refugee) kümogo. Item rongnung Turkey lima kija nung refugee kümer Syria nunger million 1.7 shi jenoka lir. Parnok rongnung tesadang ka dang nungi teimba tetsür tanurtem lir. Item refugee-tem 4000 shi alidak tesem ka nung taküm 2015 küm August ita nung Turkey nunger Fetullah Uzümeüoglu aser Esra Polat nati tena kiyimba benjong  ayongzüka chiyongdaktsü. Tenati tangar ama parnok alidak Kilis yimti nung hotel tajungtiba nung kiyimba benjongji agiteta liasü. Ajisüaka, par lima nung bendanger paikaji tejenokdak maka, chiyongtsü junga machi timtembaji ngur, Fetullah aser Esra Polat nati parnok denjiang tena kibong akümba tepela lemsatepa kiyir benjongji amongtsü lemtet. Tenati kodang par lima nung nüngdakba purtem yarir telok ka tenüng agi Kimse Mu-KYM purtem teyari agia parnoki chiyongtsü tebok sünga machi timtema alir refugee-tem den külemi chiyongtepa kiyir benjong among, idangji  parnok ajak tejak nung tepela liasü. Tenati nisung paikaji chi auso kati peladaktsüba ajanga tenasa tepelaba aküm ta tesülen  tenati kuli agütsü. Atangji, pei adianu aser medemertem jaoka kibong akümba nungjia tepela lir saka kodang tebok masüngba agi mesüra sensakba agi pelanüaka mepelatetba purtem den asen akaba agi pelatepdir, idangji asenoki parnok tejak nung tepela balaka angutsü aser Fetullah o Esra nati ashiba amaji parnok pelaba dang nungi asenoksa tepelatiba asütsü. Ibaji mesüka, asenok dak malangba kiyir benjong tulu ayongzüka nüngdak makaba nung sen endoktsü agibo, asen anasa alirtem kar danga anisüngzüktsüsa asenoki inyaktetra, iba jagi dang asen  loktibo melenshitsü. Tangarbo kiyir benjong nung nisung kwi adentsüar tejangja metetter renemer saka asenokbo kwi arutsüar memetet, anungji tapi agidang benjong renemer. Iba jagi khen khen meperir saka aiben aika anünger, anungji  takoksa ajurur. Kibong akümba ya taka toktepba ka masütsüla mesüra maka ser nung takar ama sayuba mapanga masütsüla. Ano, asenoki bilemba aser benshiba sobaliba tamajung kaji asenoki tejaokertem dang nungi sempet tsüpet kanga imlar aser apua kibong akümyonga kiyir benjongi arurtemi agütsüba agi aodoktettsü ta bilemer. Kiyir benjong ya ajak dang tetushi tematiba, anungji ajaki tushia kibong akümtsüla, saka iba tetushi aser akümji asüküm aser tiyaksangba mapa masütsüla. Iba tangatetba nung aiür asangurtem  kibong kümang aser alima nung pelanüaka mepelateti alirtem peladaktsütsüsa inyakdi.