Tepetzük tia nung alirtem temeten atema ni maneni raratsü: Mayawati

Lucknow, July 21, 2016: Tawa BJP lenir, Dayashanker Singh-i BSP Tir, Mayawati anema tejashitsü o jembiba anema Brihostibarnü BSP nung inyakertemi Lucknow nung Hazratganj tesem mokdanga BJP lenir aputsü takhangba agüja longkak aitba noksa nung angur. 

New Delhi, July 21 (Agencies): Brihostibarnü BSP tongti lenir, Mayawati-i, Dayashankar Singh-i la anema tejashitsü o jembiba atema BJP-i pa anema FIR benokba asübo ibajisa tajungba süla, ta ashi.
Tanü Rajya Sabha nung jembidang Mayawati-i, “BJP-i par lenir anema inyakba aser party nungi jentokbaji junger, ajisüaka iba den külemi BJP-i pa anema FIR benok asübo ibajisa tajungba süla,” ta ashi.
Dayashankar Singh-i la anema tejashitsü o jembiba sülen lenirtem aser party balalai la pusema jembiba atema lai pelaba olen ka lemsatep.
Linük tesem balala nung longkak aitba onük nung jembidang tanep Mayawati-i, tepetzük tia nung aliba nüburtemi laji tsüngrem ama kanga akhümtsübua la dang benshir, ta ashi.
Lai, “Tepetzük tia nung aliba nüburtemi ni kanga akhümtsübur, ni tsüngrem ka ama parnoki kü dang benshir. Nai parnok tsüngrem anema jembira parnoki jashitsü aser longkak aittsü,” ta ashi.
Laisa ashiba agi, BJP leniri la anema tejashitsü o jembiba anema lai party nung inyakertem dang longkak aittsü metuyu.
“Iba onük nung longkak aittsü atema ni shinga danga metuyu. BJP leniri jembiba olongtemji tepetzük tia nung alirtem, talisa Dalits nungeri mejungi agizük, aser parnok melungka agi longkak ait. Ni parnok menokdangtet. Ajisüaka ni parnok dang ya shiner- parnok temeten atema ni maneni raratsü,” ta BSP tongti Mayawati-i ashi.
Rajya Sabha nung Dalit nunger anema inyakbatem onük nung jembidang Mayawati-i BJP aser Congress party naprong aitsü.
“Dalit nungeri ochi temeten mangubajibo amadoktsüla, (kechiyong) parnok indang FIR-a aiben magizük aser tang tesüsabuba tatishitsüji Una (Gujurat) nung atalokba ya lir,” ta Mayawati-i ashi.
Dayashankar Singh-i Mayawati anema tejashitsü o jembiba anema tanep BSP nung inyakertem Lucknow,  Hazratganj kiyong nung aliba Ambedkar kürakyanglu anasa adenshir yimyim ayima longkak aita liasü.
Kedangsertemi ghonda 36 tsüngda Singh anema inyaktsü ta ashiba sülen ang BSP nung inyakertemi longkak aitbaji anena liasü.