Tepezü nüburtem

Asen temang nung shilem kar/tenüktelen kar tepezü akümdang asenoki ayangba mesüra angoba memeteter; iba denji kasa kodang nisung ka shisatsü nung tepezü kümdir, (emotionally numb) tensa tamajung ajuruaka mesüra lendong ajuruaka parnoki iba atemaji shishia mebilemer aser parnoki tarutsü atemaa kecha süoki ia mebilemer. Iba denji kasa asenoka shisatsü nung tepezü nüburtem lir, ta bilemer. Democracy lima ka nung nüburtemi melungba ama yimsüsütsü aser pei lima yangertsü atema lenirtem shimmer, aser nüburtemi melungba ama lenirtemi tim mesüi yimsü süra nüburtemi ibaji anema ola adoker. Tim masüba mapatem anema ola adoktsüji nüburtem temeten lir. Ajisüaka tenük agi ngua ochimashi mapatem jenti inyakyonga asenoki ola madoki odang yutsür, kechiyong asenok shi aser shisatsü nung tepezü nüburtem kümogo. State terenlok mapa balala atema Centre nungi sen peria yoker aser item jagi terenlok mapa shitak meinyakaka nüburtemi ola madoker, kümshia NPSC tatidang ajanga masü saka tim masüba lenmang ajanga sorkar mapa nung nisung jenti shimmoker saka lanurtemi/kaketshir tentettemi ibaji anema ola amadoker, Centre sorkari aluyimertem aser sensakertem taküm jenjang tajungba akumtsü atema scheme balala ajanga teyari yoker, aser item jagi sensakertem ket shitak metongaka nüburtemi ola madoker. Gari nung kerosene densema tsükaka asenoki ola madoker, relief jang/shini agi asen ket shitak metongaka asenoki ola madoker. Aji oda asenokbo lenla ajak nung tepezü kümogo! Asen lima nungbo nübur ola dang nungibo sen ola aser tashiyim ola tuluba kümogo. Bangdak nung alir ketdangsertemi tim mesüi inyakba atema ola adoktsü asoshi nüburtem dak tashi aser temeten lir, ajisüaka asenoki ola madokra Tsüngremia asenoki meyaritsü südi. Democracy lima ka nung pei lima meimba senso shiai pei lima tajungba küma yangertsü atema ola adoktsüla. India linük temzüng kübok, state mapatongtem anema ola adoktsü, yimjung nung adenshia longkak aittsü mesüra aitsütsü atema temeten agüja lir. Item temetenji linük temzüng Arrla 19 kübok Part III- Fundamental Rights Chapter nung lir. Ajioda anogoshia asenoki osangkakettem nung linük tesem balala nung longkak aitba osang balala azünger. Joko linük sorkar inyakyim nunga nüburtemi ola adoka mayimten tashibo sorkari meinyatsütsüba mesüra nüburtemi longkak aita takhangba magütsü tashi sorkari mataloktsüba yimya tamajung ka tentetogo. Iba ya tanur kati pai aginüba mataloktsü tashi ajepba agi tsüraburi pa/la taginüba ataloktsüba mesüka lir. Tanga state tem den medemdangra asen state nungbo melungtet teloktemi aser nüburtemi ola adoka longkak maiter, ibayongji ochimashirtemi sademsadema inyaker. Tanü lima nungbo kümli-tasü aser nisung tajungertembo maongka kecha mangutsüsa kümogo. Joko tanübo pei tim tangutsü aser temeten atema marendaki ola adokertemi ang maongka ngua jenjang alangzüktettsüsa kümogo. Yimtenren tsütsü nungi kodang reprangdangdir National party tem süaka Regional party tem süaka party ajaki nüburtem tajangzük angutsü atema dang aika nangzüker, ajisüaka election nung takok anguba sülenbo election mapang nung nangzükba kar dang inyaker. Union sorkar süshia state sorkartem süshia sentong ajakji nüburtem taküm jenjang tajungba akumtsü atema dang lir, ajisüaka itemji shitak meinyakra nüburtemi ola adoktsü temeten lir; iba nungi Tsüngrem-ia ‘nunga’ ta mashitsü südi. Tanübo ochimashi mapatem ajanga aseni repranga lia asen lima moksepdaktsüdar. Tanü asenoki asenok ajung dang masa-i tarutsü chirnurtem atema asen lima junga yangertsüdi süra joko asenok pezüpezüa alitsü mapang ka masü saka kanga kümküma ochimashi anema ola adoka ayimtentsü mapang ka lir.