Tepok nung mozü meyoker shibelener 2 apu

New Delhi, January 6 (Agencies) : New Delhi nung Brazil tsür ka aser Afghan nunger tebur kati ‘party drugs’ meyoker shibelentsü merangdang apu.
Tena ya Küm Tasen amungba mapang anti-narcotics ketdangsertemi apu aser tena sorkar mozüki ka nung yur anogo ishika arudang, tetsürla pok nungi süngjang 65 aser tebursang pok nungi süngjang 90 tashi agitetogo.
“Tena ya sendaktepa mali ama ajiteter. Onoki tenaprong pua lir aser Narcotic Drugs and Psychotropic Substances (NDPS) Act kübok bushisüngdang südar” ta NCB deputy director general, RP Singh-i ashi.
Tetsürlaji J Da Silva (38) aser tebursangji M Qasem (50) ta jangjaogo, ta Narcotics Control Bureau (NCB) osang ka ajanga ashi.
Da Silva tepok nungi süngjang 65 agitetogo aser ano maneni kar agitettsü ama imlar. Qasem tepok nungi heroin aketba süngjang 90 tashi agitetogo, ta parnokisa ashi.
Tenaprongla ya Indira Gandhi International Airport (IGIA) nung apu. Da Silva ji Sao Paulo nungi aru aser Qasem ji Herat nungi aruba liasü.
Tenati mozütemji küm tasen benjungtem nung yokdoktsü atema bener aruba ama temulung melemi bilemer. Onoki tena den tesentaktep alirtem aputsü atema bushisüngdang tenzükogo, ta NCB ketdangser kati ashi.