Tepuokdak nungi adokogo ta mamangteter:Sanjay Dutt

Mumbai, February 25 : Tanü Brihostibarnü Bollywood actor Sanjay Dutt -i Yerwada jail nungi chiokba sülen osangbenertem den jembiba mapang par jakrep, jabaso Shahraan aser jala Iqra na dak azüiter jembiba noksa nung angur. Iba mapang kinüngtsü Manyata-a parnok den densema liasü.

Mumbai, February 25 (Agencies): Ozüng alema AK-47 prangpong ka yua aliba atema Yerwada Central Jail (YCJ) nung puoka alisang, Sanjay Dutt tanü Brihostibar chiokogo.
Pai, talenba ka nungi salaba ya atamata tepelatsü mapa lir aser tepuokdak nungi adokba ya ni ano mamangteter, ta ashi.
Tepuok dak nungi chioktsü meteter mejangba aonung Sanjay ayipjanga memejangteti shishi aser Brihostibarnep pa tepuokdak nungi adokdang tula anüngsentsü ka den denim (jean) longpant ka semer liasü aser pai kima alua pa yangkhu ali nung yur linük wako nem salem agütsü.
Pa agizüktsü asoshi tembartem aser kinungertem aika YCJ kima adenshia liasü.
Sanjay ya par tsürabur Nargis aser Sunil Dutt na den kanga putepa liasü. Pa tepuokdak nungi adoker kidangi mao tsüngda Marine Lines, Mumbai nung tetsü leper tama semdang aser kidang tebu noksa tsüngdang akhümtsübu agüja tenaprong dang temoatsü meshia liasü.
Par kima tonger külen osangbenertem den jembiba mapang Sanjay-i, “Ni küm 23 tashi iba talenba nungi salatsü yongyaseta liasü aser tatem nung ni yongyaba mapang moaogo. Ni tepuokdak nungi tebilemtsü ajak pongzüka yutsür adokogo ajisüaka ni ano mamangteter. Ni khen lir ang akhi yimya dangi arutsü…ni parole nung adok amai ni bilemer,” ta ashi.
Arishi küm 56 tain, Sanjay-i ki tongli süngo marok ka tama ajem aser pai ajak tanga tebu, asür actor Sunil Dutt temenungraba, ta ashi.
Pai, “Kübo taküm ali asübo ajak tanga pa sa tepelaba süla. Ajak toktsür pai kü nüjiso atema kanga meranga rara. Ni tanü ‘Oba ni nüjiso nguogo’ ta shiteter,” ta shisem.
Osangbenertem den jembiba mapang kinüngtsü Manyata-i pa dak tsüloka arua azülok.
Kü kinüngtsüji ni atema tashi anguba tongnü lir ta ashiba mapang pai, “Ni tepuokdak okrongba dang nungibo kinüngtsüi tokrong tuluba ajangshia aruogo,” ta ashi.
Tepuokdak ajangshiba kar lemsatepba mapang pai, “Ni shidi agi juli yanglutsü angazük aser YCJ nung radio jockey ka ama jangratema inyakba den kinüngbo tajung ka ama shidi agi yanglutetba juli ajanga aatetba sen ajak kinüngtsü nem agütsü,” ta ashi.
Joko pa tang nungi kibong aser mapa nung mapang entoktsü tebilemba lir.
“Ni tanaben mapa nung amtaka inyakner,” ta temulung shiranga ashiba mapang par jakrep tanur ana, jabaso Shahraan aser jala Iqra nati pa dak azüiter tebang mesepa liasü.
Security kanga tashi ita liaka pa sapurtem aser tembartemi pa dak meimba mimbanga mayu.
Sanjay nem security agütsüba nung yaritsü asoshi pa den “Chal Mere Bhai” film nung külemi shilem agisang, actor Salman Khan-i pa meyong bodyguard tem dena yok.
“Salman ya küno aser ni pa atema teti sarasademtsütsü,” ta Sanjay-i ashi.