Tepusemtepba tebilemtsü

Nagaland jungnüseta majungba timtem aika rongnung kaji tai nung süaka pei kin mesüra pei yimertemi pusema nokdakba tebilemtsü ya ka asütsü. Hau, atangji tajungtsütsüa reprangdi süra lokti menentsüsa tamajung inyakertem anema pei kin aser pei yimertemi longjemer inyakba mapatem aika lir. Iba jagi aiben lendong timtem tulu ataloktsüba nungi kümzüker aser ano pei nisung azüoka yutetter. Ajisüaka, kodang asenoki government-i inyakba mapatem nung pei kin aser pei nisung atsünga inyakdir, iba jagi government mapatem indangindanga meinyaktettsüsa akümer. Aji oda, government inyakyim kar nung meshitaki inyakba puteta nisung kari ibaji anema ola adokra mesüra bushisüngdangtsü tenzükra, ibaji office nung inyaker kar anema inyaker amato agir, anungji par kin mesüra par yimertemi pa mesüra laji pusema nokdaker. Shibai metet, nisungtemi office nung inyakertemji aitsüaka pa mesüra la mapa nungbo shitak alitsüa akok, anungji ibaji par kin mesüra par yimeri masü saka government-i bushisüngdanga bentettsüla. Iba amaji kodangsa nübortemi government inyakyim kar anema ola adokdir, ibaji sangdong ka ajanga jet ta nembanga yutsütsü memerangi government inyakyim nung aliba ama tebushitsü purtemi jungjunga bushia tapet mapa inyaktsüla. Atangji, aiben pei kin aser pei yimertemi ola adoktsüsa akümbaji government nung alirtemi tejak repranga inyakba ajanga ataloker. Anungji, akok tashi government nung alirtemi maparen ajak nung ochishia kechi shitak aji inyaktsü merangtsüla. Shitak inyakba nung pei kin aser pei yimer ta bushia aotsü mesüra arutsü lenmang mali. Iba amaji shitak inyaka nübortem ajangzükdaktsütsü melen meshitak inyakba mapatem nembangtsüsa pei kin aser pei yimertemi ola adokra, ibaji asenoksasa asenok ashioktsür asütsü. Pei nisung mapa nung kari danga temulung melemi ken o adokra, ibaji jungjunga bushisüngdanga jangjashitsü ajungshitsüba daka alaka temulung melemi jembirtemji amokmerena ola madokdaktsütsü memerangtsüla. Tanü asen lima yimten mapa nung ochimashi ulura saka ochimashi mapatem anema ola adoker mali, kechiyong ibaji pei kin aser pei yimer anemba ken o kümer bushi tenzüktsü. Asenokbo, kechiba tim masüba mapa inyaker aser ochimashir pusema dang alitsü ? Kechiba asenokbo tim masü inyaker aser ochimashirtem tenüng dang sanga alitsü ?  Pei kin mesüra pei yimer asütsüa akok saka alima akongtsüsa aser tarutsü putu dena akoksatsütsüsa inyakertem anema ola adokba nung asenoki pusema nokdaktsüba dak alaka asenokbo ochimashir pusemerbo masütsüla. Aji oda, pei kin mesüra pei yimer masütsüa akok saka shibai nübortem meima ochishia mapa shitak inyaker, item mapatemji asenoki reprangteta tenüng asangtsüla. Iba tangatetba nung Naga nunger kin aser yim telongjem tashi ya Nagaland raksakba nung masü saka Nagaland yanglushiba nung amshitsüsa kati ka artsütepa ajungshiteptsüla. Kin telongjem ayutsü tim aser yimer telongjema junger saka iba telongjemji ochimashir aser meshitak inyakertem jenokdak masütsüla. Tanübo asenok maparen nung asenok telongjemji ochishir atema jung asütsü melen ochimashirtem asoshiang tejenokdak aküm amai angur. Ibaji melenshi nung dang asen lima nung ochimashirtem dang nungibo ochishirtem teimba küma parnoki nübortem asoshi mapa tajung tasü itta inyaktsütsü.