Tera Agi

Tera ta kodang südir, ibai ishika mesüra tilaka dang ajar. Ya kanga mechimenu, mezüngshiba, mesüra züngoktsüsa jenjang maket, chikhumajung. Iba yabo oda mangu ama toktsütet. Tera ta asüba nung yabo tebilemtsü mesüra khuret mali. Kechiaser tera, ishika, tilaka yabo oda ajaki agütsütetba aser ngutetba ka lir. Kodang tera ta jembidir, ibaibo mapang timbaka nung angati asür. Asenoki kiyonger kidang metsü, mersü, süngojok, amala tera meshitsü akok. Tera dang asünungji ajaki menungnangi odang angati agütsür. Teraka agütsütsüba nungji khuret mali. Ano senpu-tsübuba mapang nunga, kodang nisung kati sen tera apudi mesüra apujang ta südir yangjibo khuret  mali. Kechiaser teraka atemajibo tebilemtsü kecha mali. Anungji meyipa anguyonga manguyonga kecha masü ta sür nongnanga melii asenoki odang aputsür. Asenok anogo shia taküm liyonga aodang tera ta asüba o nung ya tebilemtsü aser khuret kecha mali. Chiyungtsü süshia, senotsü süshia terakajibo ajaki züba-zübaa bener arutetter. Teraka bener arutsübaji tasak masü. Aji oda süaka, ano tera ta asüba yagi asenok taküm nung tasü o taküm na bendangtsü akok. Nisung ka ticket ajak renema yur Delhi mesüra Mumbaii aotsü apuso, saka airport tera menur atong, idangji tayimtsü oadoker liasü. Nisung ka Chennai-i alutsü atema ita ka jelia ticket renema ayu, saka Dimapur railway station tera menur atong. Idangjibo train oadoker liasü. Tera menuba ajanga aienlen jagi mouteti sentong ajak amajok aküm. Class ter result nung mark tera agi matongba ajanga top 1 jenjang mengutet. Mark tera agi matongba agi top 20, first division mesüra second division jenjangi mai. Mark tera agi matongba agi fail asü. UPSC aser NPSC tatitang kanga junga agütsü, saka mark tera agi matongba ajanga fail asü. Mark tera agi mabensaba ajanga taküm piyong mapa mengui timtema alitsüsa aküm. Ano rasadi süra tera indangji yamala mesükba aika dang lir. Gari tera mekümdangi ani, accident tulu ajurua tsükset. Gari tera yimbazüa anidang memeteti accident ajurua taküm piyong lemtar alitsüsa tetsüng-teben kosük, koda tesasatsü. Mozü tera tali ajem; timtem tulu ajuru. Mozü tera tai agi; ajungbena süadok! Tola temesüng ka nung  memeteti rong temerem tera teplok, joko ibaji menendoktsüba dang, mesüra mapa inyakdang asemtsüba dang. Tejak kanga junga meyir powder tobur junga menok, saka ponak tera atsük, iba jagi tangari menütsür, mesüra pa mesüra la tobur ajungba ajakto tazüngla kümdaktsür. Taküm nung tera yagi  timtem, teraksa, tamakok aluba aser ajuruba aika angutsü. Tanü asüng asenok Khristantem taküm ya reprangdangra ‘Tera’ ta asüba nungji na alanga melikama? Temenen tulukabo masü, saka kanga tila –  Sübokrem tera agi, tiyazü tera jembi, tangar tera ashioktsü,  tera külakzük, nüngsen tera jembi, jembishinü tera mazüok, tekalen tera meshitak, achi-ajem tera mazüok, nüktapangta yimya tera aket, ano yamala aika. Itemji tera mesüra tilaka dang asünung temenen tulubo masü, tebilemtsü kangabo mali amai. Saka meimchir tenük nung anak tera ai nung tenük mesakteti kecha mangu akümba medem, temenen tera mesüra tila ka jagi molumi tiai anitsü aser tera agi kotaki moutettsü. Temenen teraka metoktsütetba ajangaji tera nung,  tila ka agi kotaki mouteti molumi tiaji ajangzükra ayatai! ibaji koda tesasatsü tulu asütsü. Anungji tang temenen tera nungji asenok mepitaka alanger lia tasübai menepadokra jepaka nüktzü maluba tiaji ajurutsü. Ya oda lepshia ashir, ‘Tera’ ya tuluka, aika mesüra tesashibo masü asünungji yangji khuret aser tebilemtsü kecha mali. Ibai mangu ama odang toktsütetba ka, saka tera jagi asenok indangindanga molumilen jagi anir asünungji, aser tera ya meindoktetba aser mazüoktetba ajanga tesamar rongnung densemtsü asünungji, tera nungjagi talangka pilaa alitsüla. Tera nungji alepdaker alangtsü aser taküm samatsü masü na?