Tera nungi atsüteta endokba metsü

– Mr. Imly Jamir., Ass. Pastror, DABA.

Aluyimertemi metsü ayudang kanga kümdanga süngdong tajung nungi dang süngjang agizüka metsü ayur. Süngdong tajung mesüra metsüjiang magir.Laishiba nung Tsüngremi memulungba chuba aser nüburtembo tera nungi atsüteta indokba otsü aika dang laishiba nung shia angutsü. Item rongnung Tsüngremi Yeroboam indang yamai ashi. ”Anungji ajiangang, ni Yeroboam kidong anema tamajung bener arutsü,aser Yeroboam nungi tebur chanu ajak leptoktsü; shiba shibanga ali aser Isreal nung ali ajak yamaji ki aokertemi jana okdokba ama Yeroboam kidong nungi meshimeshia ajak mesama tashi okdoktsü.Yeroboam kinunger shiba yimti nung südir azütemi achitsü aser shiba moapu nung südir, anüng ozütemi achitsü kechiaser Kibubai yamai jembiogo.”( 1 Chuba14:10-11.)
Yeroboam ya Solomon chubai terenlok maparen mapa inyakertem ajak reprangtsü nungloktsüba tongti nisung ka liasü. Saka pai lia lia chuba anema noktak aser pa sasaa pa melitettsüsa aküm nung Egypt limai jena ao aser Solomon chuba masü tashi idakji ali. Solomon sür pa tanaben meyipa arudangbo Israle yimli ana küma lemsar liasü. Israel yimli (Northern kingdom) aser Yihuda yimli (Southern kingdom), anungji pa Israel yimli nung mezüngbuba chuba asütsü maongka tulu angu. Kodang pa chuba aküm, pai mezüngbuba inyakbaji par yimli nung süngyanglu tenla kitem aser süngyanglutem agi yimtitem sünga amenIok aser idakji nisung tepseta tarongba tenla agütsümeso. Pai alima rongsen jenti bendena kanga takar aküm.Neburtem Tsüngrem nungi talangka piladaktsü. Aser pa taküm ya Tsüngrem den tokteper küma asüküma alitsü tenzük. Pa ya chuba chira masü sür nung Tsüngremi asaa dang moatsüba maongka nung pai kanga asüküma Tsüngrem sentok nung Tsüngremia pa sendoktsü atemzükba tamalen shisemba asenoki nguogo. Yamaji Yeroboam chuba nungi jakzükbatem tanur anadak alaka ajak azü aser anüng ozütem chiyongtsü aküm aser leper nung ka danga marem.
Tsüngremi tanur ka leper nung arerntsü mela saka iba tanur yaa Yeroboam chuba kodang iba tanur aliba yimti süngküm nung tetsüng ajemokdir idangjisa tanurji asütsü ta Tsüngremi ashi aser yamaji asangsang nung atalok. Tsüngremi agütsüba maongka jenjang tulu nung mener Tsüngrem mezüngmeshi nung iba tanur leper nung aremtsü melaaka taküm lia ajurutsübo memela. Ajidang masü ano par chir ka tenüng agi Nadab wazüka toktsü aser pa ya Yeroboam melena chuba aküm saka küm ana dang yimsü asü aser pa yimsüsuba tembangadok aser yamaji Yeroboam nungi jakzükbatem tatem küma tera nungi meshimeshia Tsüngremi atsüdok. Jenshia dang aliba nisung ka Tsüngremi anir arua chuba kümdaktsü saka Yeroboami Tsüngrem den toktep nung pa nungi jakzükba metsüji iba alijak nung alitsü memela,aser par otsü yangji tatem kümdaktsü.Tsüngremi nung ta shir mangaba mapa nung takoksa ya ulura lir.
Takar nisung kati kü dang yamai ashi, “ nenoka Tsüngrem jiluji dang saia teli, mapa nung anener kong alitsüba, ki mali, aser ano nenok pension-a mali, kechi chia alitsü ta bilemer. Mapa kar danga inyakang, onok ya repranga tsüraburi kecha meyutsü saka ni meranga tekolok amshia inyakji ozü semchirtem tashi peria agitsü bendena lir. Ozü tanur asem dang parnok ajak atema ali alia ki renemtsüogo, tebilerntsü kecha maka.
Ni tenla-a magütsüra aser sentepia maor saka ni meranga inyakerji mapang shia senji peria dang angur, tanura ajak tajung danga, onoki sarasadema masür saka odang angur. Kangabo Tsüngrem jiluji mesaii dang onok ama khuret makai pelaa linüra rongsen bushiang”.
Ni pa dang ashi, “ tashikang tener aruba rongsenbo tagütsüsangisa tashikang tener bener oadoker ako, sarasadema agiangma.” Iba sülen ni sarasademdi ta asüdang kinungtsü jagi tai tokang ni nüngdak tuluka lir, nibo oadokdi nenok dang sarasademang ta shir oadokji ni dang sarasadema toktsür aru. Iba sulenjibo ni par ya kena majurudang küm aika lia aru. Parnok külem alir kar dang par toa koma lir ta asüngdangasa aru. Mapang ka nung par aliba town jagi oshia ata, anungji ni par ki jagi odang. Idangjibo kima ajungaji arem kümadoker kidangji nisung shinga mali amai azüng azünger liasü. Ni kima nungi jadang nung telangzür mali tatsüka lir nisung kati langzük aser atung ta ashiji tanüa kiburba to lir ta bilema atudangbo kibur to tula tejenka semer wheel chair nung mena liasü. Odi, niako, ajiteter südi ta asüdangdang, pa kanga temulung rasaktsü tenzük aser ashi, Tsüngrem tenzüker ni to ali tonga aluogoni ta shia ajep. Ni odi, ya koda asü ? Kü dang shiang ta ashidang, tanemi otzüji tenzüka iba adianu jagi ashi. Na alidang aliba tanur asemto ka mejangba mesak, ka medemer den picnic-i aoba tzü nung asü aser tetzürla to kari accident nung süadokogo.
Nia stroke sür küm terbuba, Iba amai kidang dang alitsüsa kümadoker alinung kübutsüi site to ayok aser iba senji bener oadokba kong lir memetet. Ki sünga aliba kilirtem to ka danga mali. Temeimer adianutemi agütsüba chiyongtsü dang chia yamai timtema alirani. Ya tangari masü ni junga alidang ni küsasaa dang alir ama ni Tsüngrem den toktepa aliba, ni masüdang kü tenük agi ngua Tsüngremer temerenshi kü madak lir. Tsüngrem denbo tetoktepno ta nüburtem dang shijang. Ni ama tamashir tesü, ni semchir tashi peritsü ta bendenba rongsen to senpak ka danga anünga mali senmangera kadanga mali meshi meshia iba alijak nungi Tsüngremi okdokogo. Ni sensaker ka aso, aser ni asoba tia dang nungi tamajungba tia nung ni asütsüa ta pai ashi. Ni asoshi taochi suitemogo, ni ya alima nung jenjang kecha makaba taküm nenok amai pelaseta aonung kadanga ejangdangnüra ta ashi. Saka iba adianu asoshi Tsüngremer mapang süiadoker liasü. Süngdong tamajung nung atangba süngjangbo metsü magiraogo.
Tsüngremi Yeroboam dang ashi, ni maochitsü, ni meshimeshia okdoktsütsü, yamaji alijak nung Tsüngremi inyak. Asü tekümni, meimchirtem, alima nung rongsen jenjang tuluji asen meyongdangbo masü. Rongsen jenti akasang adianu jagi ashi, “ni sentepi maor, sarasadem masür aser tenla agütsütsü nüngdak mali, ni küsasa bendenba rongsen jangratema agir, ki tajung nung kilir sünga yur onok jangratema alir”. Tsüngremi repranga dang atar. Pai kanga asüküma mezümeküm jakla bener, ajak rongseni akoktsü ta bilerna alidang Tsüngremer nok par kidang kecha osang magütsüi dang ait aser meshimeshi lepdok.
Pa nungi jakzükba metsüjanga ka danga anünga meyutsü. Koda asenoka mapang tajung nung mezümeküm o ya koma jembinür yamaji jembia liang, saka Tsüngremi tangar dang inyakbaji asenok asoshi tangazüktsü tajunga ta bilemer asoshi jenbutsü lenmang lir.
Tsüngremi moajang.