Teraksa Putu asoshi osang (T.Ken 45)

“Khrista osangtajung asoshi ni maaker” (Rom 1:16).
Arogoji teimla makaba lima nung teimla aliba nübur ka lir. Laishiba nung mamangertemji teimla makaba pur ta amshi (1 Tesa. 4:13). Tamangertemji tajung bilemertem lir. Asenoki alima dang iba tajung teimlaji koda sayutsü?
Asenoki tasü itta osangtajungji sangdongtsüla. Idakji tatala aser rishikangshi alitsü akok saka asenoki aji metsübutsüla. Noai rong yangludang mezüngmeshi koda ka ajuru? Khrista osangtajungji iba teraksa asoshi lir! Asenoki iba asoshi peladi! Kin ka aser kin ajunga tebilemtsü asoshi Khristaji teimla lir. Idakji tanga lemang mali.
Kodang alimai aser kijai chubatem madak chuba aser kiburtem madak Kibur amatokdir parnok samar. “Sentsüwangshi Khrista osangtajung sangdongbaji Khristan shia ajaba tejangja ola asütsüla. Kodang osangtajung asoshi rishikangshidir nisung chiri Tsüngrem tajichilen mener mulungsoa agizüker ta bilemtetang (T.M. 7:55). Pauli tetentangbatem ajanga aodang kodanga tasü meiti maküm. Kibuba nung Tsüngrem tenangzükba teimlai ajungmesodaktsü. Pai Agrippa chuba matsüngdang kuli asü, “Tsüngremi ozü tsüraburtem dang nangzükba nung yimlaba asoshi O bendangtsü ni yangi noktaka lir” (T.M. 26:6).
Iba teimla sangdongtsü asenoki aaka malitsüla. Khristan kati Khrista asoshi kuli asütsü atidakra pa/la tamang nung tashi mait. Khristaji shidakba lenmang ta ni amangra, ni ajemajema malitsü. Asenoki Khrista asoshi kuli masüba atema Pai kanga süoki ia bilemtsür. Pai ashi, “Kechiaser iba nüktapangta putu nung, shibai ni aser Kü o asoshi nüma matanglir, nisung chiria pei Tebu sentsüwangshi nung temeshi kotak tenyartem den arudang, pa asoshi nüma matangtsü.” (Mk. 8:38).
Tamajung tebilembai tangatetba kina yaretdaktsür. Parnok asoshi asüng kechi ataloktsü parnoki memeteter. Saka asenok tamangertemi shibai tarutsü meta lir paji metet. Yashi aser tanü Khrista asünga kasa alitsü (Ibri 13:8). Asenok meketa nübur timbaka sannüker maliba san ama lir. Kodang nai parnok den osangtajung lemsatepdir parnok pelar. Nisung shibai nenok temulung nung aliba teimla asüngdangdir pa dang langzütsü nenok renema liang (1 Peter 3:15).
Kibuba Yisu, Ne tekümtet osangtajung ni tangar dang ashitsü jangraa lidakjang. Amen.