TERENEM TEKÜMZÜK

“Saka nabo iba anogo ni kümzüktsü, ta Kibubai ashir, aser nai shirnok tsübur parnok ket nung na magütsütsü.” Yerimia 39:17

Kodang Kibuba dak tamang katetba tenzükertem timtemdir, parnoki Pa nungi temeim osang angashitsü, aser ken-ken parnoki aria bilema yarirtem asoshi tepela osang angashitsü. Ethiopia nunger Ebedmelek dang sempaa liasü, Kibubai pa atema tenangzükba balaka ainkar tebang ajanga jembidaktsü. Asenoki teti Tsüngremer tenzükertem rishikangshiba temulung lidi, aser Pai asenok nem sempet agütsütsü.
Ebedmelek dak shibai mang ayangtsü bilemer pa ket nungi kümzüktsüba liasü. Pa ajemaluba tanak nisung ka liasü, saka Kibubai pa asoshi anepalu. Chaldea nunger mirijang aika tepset, saka iba ajemalu kilir meyirutsü. Asenoka asen dang nungi tuluba, tashi taitbai sempatsü aser anemtsü akok, saka rishikangshi mapang nung asenoki Kibuba asoshi tamang katetta lir, Pa asen tsütsü tamang katetta alitsü. Ajakji liaka, Kibuba tenangzükba medeni nisungi kechi inyaktettsü? Pai ain adoka aliba tebang nung temeteptsü inoktsür aser tashi tait kolak nung tesottsü inoktsür. Asenoki kodang Kibuba tsübudir aser asenoki shinga tsübua malitsü. Tsüngremer ainkar nem tzüzü marok ka agütsübaji meyipa magütsüi malitsü, aser asenoki Yisu asoshi nokdakra Yisui asenok asoshi nokdaktsü.
Kibuba Yisu, Na kü tsütsü nokdaktsüsa ni Ne tsütsü, Na atema nokdaktsü yariang. Amen.