Terenlok angutsü atema yimjung aser telongjem nüngdak: Vikheho Swu

Tuensang district nung Noklak Sub-division kübok Panso nung gari lenmang tasen aser Guest House lapoktsüba sentong nung Minister Y. Vikheho Swu aser P Longon na den Parliamentary Secretary L Khumo aser tangartem sobaliba yimya nung agizükba noksa nung angur.

Noklak (Tuensang), June 15 (TYO): PWD (Roads and Bridges) Minister, Y Vikheho Swu-i tanü Noklak sub-division kübok alirtem dang terenlok angutsü aser tejakleni aotsü atema mangatettep alibatem angatetteptsü aser yimjung nung alitsü ayongzük.
June 15, 2016 nü Health & Family Welfare Minister, P. Longon den külemi Panso nung Panso-Yakor village PWD road aser Guest House lapoktsüba sentong nung Vikheho Swu-i iba tayongzükba agütsü.
Tuensang district kübok Noklak sub-division nung aliba kintemi telongjem nung tashi lir ta tangar dang tatishitsü sayutsü atema putepa liang, ta Vikheho-i ashi.
Asenoki asen sobaliba metoktsütsüla aser yimyatsüya tajungtem benshitsüla, saka tesüiba mapang kin o kin tsüngda meputep alibatem agientsüla. Iba tesem nung alirtem tsüngda rara anentsüla aser yimjung nung loktiliba dak sendakba ken o tem angatetteptsüla. Ibaji asünungdang terenlok alitsü aser ano tanga Naga nunger kintem asoshi tatishitsü tajung asütsü, ta PWD (Roads and Bridges) Minister-isa ayongzük.
Land Revenue, Village Guards & Women Resources Development Parliamentary Secretary, L. Khumo-i Panso-Yakor PWD lenmang yangluba nung tongti shilem agiba atema Vikheho-i pa dang pelaba ashi aser nübortemi maneni Khumo aser state sorkar pusema nungittsü paisa ayongzük.
“Naga Yimten Tebilemtsü atema telemtetba ka mongura, Chief Minister, T R Zeliang lenisüba kübok NPF-i aniba DAN sorkari kümsük tembanga inyakba dang masü saka 2018 elections nunga takok ngua sorkar maneni abentsü. Anungji iba tesem nung maneni terenlok alitsü atema nübortemi Khumo shimmer sorkar dangi yokang” ta Vikheho-isa metetdaktsü.
Sentong nung Minister, Longon-ia o jembidang, kin balala tsüngda longjema alitsü ayongzük.
Election mapang mangatettep alitsü akok saka election dak sendakba maparen tembangba sülenbo item onüktem toktsür, nübortem külemi terenlok aser tejakleni aotsü atema longjemtsüla, ta Longon-isa shisem.
Parliamentary Secretary, L. Khumo-ia o jembidang, ali kiburtem dang terenlok mapa inyakba nung tetsükdaktsü bener marutsütsü atema ayongzük.
Sorkar nem memorandums agütsütsü melena, ali kiburtemi pei lushi sorkar nem mulungsoa tenlatsü aser iba jagi dang terenlok bener arutsü. Terenlok aginüra, ali kiburtemi timtem kecha magütsüi dang pei lushi agütsütsü mulungtettsüla, ta Khumo-isa ashi.
Iba sentong nung mendenji C Langshe liasü, Panso Baptist Church Associate Pastor, P. Popoi-i temoatsü meshia sarasadem, Panso VDB Secretary T. Tangsai-i tesentepertem pela agizük, Chairman PVC K. Chetei-i anküp tepela o jembi aser PBC Associate Pastor (Youth) H. Chingkhong-i tenüngsang agüja sarasadem.
Sentong nungsa Chief Engineer PWD (R&B) Kruse Rhetso-i o tatsüka jembi aser Lengyu o Panso Cultural troupe nungeri yartsüngsang shilem agi.