Terenlok atema hadirji shisaliok lir: Nagaland Angh Acharya

Dimapur, November 07 (TYO): November 7, 2015 nü School of Management Sciences (SMS) Campus, Dimapur nung Tech Aura tatembangbuba sentong nung jembidang Nagaland Angh, P.B. Acharya-i, lokti ka, linük ka mesüra state ka nung terenlok kanüra, iba atema hadirji shisaliok dang lir ta ashiba den külemi lokti atema asenok teinyaktsü khuret tulu lir, ta ashi.
Paisa, Nagaland ya golden Nagaland akümtsü atema tashi lir, aser iba atemaji nisung shia teinyaktsü lir, ta ashi.
Angh-isa, “India tongti aser alima dang, asenoki inyaktettsü, asen state nung dang masü saka India ajunga nung yimjung alitsüsa inyaktettsü ta alima dang sayutsü mapang tongogo,” ta ashi.
“Nagaland ya Golden Nagaland ka akümtsü atema teka mapa nung tetangshi nüngdaker. University ya shisatsü atema Centre ka dang masü saka terenlok aser yimjung atema-a Centre lir,” ta Acharya-isa ashi.
Tanü iba sentong nung Asst. Prof. Lumami Campus, Kilangbenla-i sarasadem, , SET & SMS Dimapur Dean, D.P. Chaturvedi-i lokti pelaa agizük aser Tech Aura 2015 Co-Convener, Shokyuileng Hungyo-i anküp tepela o jembia liasü.