Terenlok atema yimjung nüngdak: CM TR Zeliang

Dimapur, November 17 (TYO): Jalukie Town küm 50 ajungba Golden Jubilee mong tanü November 17, 2016 nü football ground, GHSS, Jalukie nung ‘Towards Greater Heights’ omen nung ajemdaker mongogo; iba sentong nung Chief Minister, T.R. Zeliang tongti tesemdanger liasü.
Iba sentong nung tongti tesemdanger o jembidang T.R. Zeliang-i, terenlok alitsü atema yimjung nüngdak, ta metetdaktsü.
Paisa, “Naga nungeria ajak inyaktettsü; asenok longjema ali nungang asenok tejakleni otettsü. Asen lenirtem mapa tajung atema asenoki peladi,” ta ashi.
“Mangdang kija agi dangbo tarutsü anogotem tajung majangzüktettsü, iba atemaji ajaki amalitepa inyaktsüla. Mapa agi meinyakra mangdangji mangdang dang asütsü,” ta Chief minister-i ashi.
Paisa, teti atema telemtetba ka dangi marura yimjung malitsü, aser ibaji ajanga terenlok malitsü, ta ashi.
“Anungji Jubilee tanela nung nüburtemi tesüiba mapang amadoker tai atoktsüla, aser tejakleni aotsü atema longjemtsüla,” ta paisa ayongzük.
“Jalukie jila tentettsü atema lenir tajung aikati kanga meranga inyakogo. Asenok küm 50 jungogo, anungji tebilemba tasen aser melungsentsü temerük den mangdang tajung yur putu tasen ka nung ajemoktsüla,” ta Zeliang-i ayongzük.
Tanep chief minister TR Zeliang-i Jubilee nüngshilong aser Jubilee Souvenir sayatsü aser Rev. Kuzierang Thou, State Chaplain-i meshiteta sarasadem; Old Jalukie Village-i ‘Heruikai’ saya aser Mongzeung Mpom, Pastor JTLBC-i tatem sarasadem agia liasü.
Sentong nungsa Old Jalukie Village Council Chairman, Deputy Commissioner, Peren aser DUDA Advisor nungeria o tatsütsü jembi, Iriegong Mpom-i sobaliba ken ka aten, Jubilee Choir-i Jubilee ken aten aser Steering Committee züngsem, Imtui Mpom-i tepela anküp o jembia liasü.
Jalukie Town Golden Jubilee sentong nungsa Minister tem, Parliamentary Secretary tem, Advisor tem, Peren district nung Office balala nungi tekolakpurtem, Public lenirtem, nüburtem NGO’s, Arogo balala aser kaketshirtem tentet balala nungi nübo aika dena liasü.