Terenlok indang bilemdang asen temetena wazüka yudi

~ S. T. Yapang Lkr. Kohima.

Feb 25, 2019 anogo medemer Odi Jamir küna Kohima-i meyipa aorba Yisemyong atongtsü anasa tzümar kari lenmang lentiji süngzü agi mesangdanger parnok lenmang tua liasü, yangji lua metsümeshia tatsüka kazüaka lenmangji melapoktsü anungji onoki or, “kua National Highways nokdanga ayutsüsa shibai ne nem tashi agütsü? Aser iba order-ji sayuang” ta ashi nung mesayutet, anungji tangsa tang lapokang ta shir apuso, lenmang tusa inyaksangshidang lenti nokdanga yur inyaktsüsaji tashi agütsüa melira yamaji mesüdaktsütsü tim, kechiyong koda masüba tesem dak alaker lenmangji menokdangia tezülen nungi tuzüker truck nung inoktsüli bener oa toktokli ta asütsü takoktsü lir aser item sen ajakji densema contract nungji alitsü ta amanger, ano telidakpuri dang mulungerbo akok tashi aonung inyakdaktsütsü junger. Tang ashiba tesem nungjibo nisung senzüba mapang dang lenmangji atuba angur.
Tang tesüiba indang jembitep nung lepa arutsü masü, saka tarutsü asoshi asenoki metettsü ka lemsateper, tang asen Ao lima nung inyakba dang tuluba Kma Dim lenmang nunga inyakdaki, yangji ali tuzüktsübajibo yutsür ali indoktsübajia sen talang tashi agütsür dang indokdaktsür, yamaji asüba agi iba ama lenmang tulu yanglutsüsa marutsü ta mali, aser asenoki ali angati agütsüba agia lenmangji tajungba yanglutsütsü taa masü, asen magira asen akoksa dang, aji jenjang talang Govt-i latettsüa lir nung koda. Hau tamalenbo lenmangtemji asen sasa nübu aser rongsen jenti tenla atuba timba lir, saka tanüa iba kasa tosa bilema lira asen akoksaba dang masü meyiper asenokji pei temten memetetba aser mamshiba nübutem ta tangari bilemtsü aser talila dang mezüngmeshitsü. Tamalen angati inyakba tang sen aika aazüktsüsa asütsü akok, ano maparen kar nungbo tamalen sen jenjang onsara tasak asüba to tangbo jenjang talang asütsüa akok, yamaji asenoki alima ainba den lirumedema lidi.
Asenoki aiben ‘asenok asoshi lenmang tutsür nung yangji asenoki akokba tashi yaritsüla’ ta bilemtsü, aji junger, saka asen temetenjia shitak wazüka yudi.