Terenlok Kija Menüngdak

Tawa India nunger 73buba Independence Day anogomong nung Ato kilonser, Narendra Modi-i nüburtemi shisadangtsüsa onük tajung aika jembiogo. Red Fort nungi jembidang Modi-i, Aso 21buba den liromedema infrastructure alitsü, India nunger rongsenkettsüng 5 trillion dollar akümtsü, osettsüset jenjang azüoktsü, terenlok mapatem kera inyaktsü, nütsüng arenba azüoktsü, tourism ajungkettsütsü, sensak tia samatsütsü aser tzü tebilemtsü atema Ministry temeja ka tentettsü densema onük tasen aika jembi. Ajisüaka pai jembiba otemji mapa küma inyaktsü asü meinyaktsüar ibajibo mapangi dang ashitsü. Modi-i ashiba agi, pa mezüngbuba kümsük 2014-2019 nung nüburtem nüngdak nung rangloka liasü aser tanabuba kümsük nungbo nüburtem taginüba ataloktsütsü. Tang India linük rongsenkettsüng jenjang kanga mejungi lir, aser linük nung Hindu yimsüa alia amangertemi minority tem anema inyakba mapang ka nung pai item ajakji nembangja India nunger puatsüsa o tajung aika jembiogo. Taoba mapang Union Finance Minister, P Chidambaram-i mapang shia India nunger rongsenkettsüng jenjang tamajungba akümba atema jembia aruogo. Hombarnü taoba RBI Governor, Raghuram Rajan-ia linük rongsenkettsüng ainba jenjang mezülongi akümba ya kanga shisabulutsüsa onük ka lir, ta jembiogo. Yashi Niti Aayog Vice Chairman, Rajiv Kumar-ia, tesüiba küm 70 tsüngda India nunger rongsenkettsüng jenjang tang tamajungba, ta jembiogo. Yashisa Prime Minister’s Economic Advisory Council nungi züngsem, Shamika Ravi-ia linük rongsenkettsüng mainba atema tebilemtsü kaa jembiogo. Ano külen Hokolbarnü (August 23) India nunger sen ‘rupee’ jenjang ano tamajungba küma US dollar 1 den medemdangra India nunger senbo 72 kümogo. Ajisüaka tia maka, India nunger nütsüng timbakati Modi yimsüsüba kübok linük rongsenkettsüng jenjang tang tajungba amai bilemer aser pai jembiba oji tzüratema agizüker. Modi-i linük terenlok aser rongsenkettsüng jenjang atema anogo aben jembia arur, ajisüaka tanga lenla balala nung nüburtem timtemba mangateter ama bilemer. Atangji alima nung alir asünungji linük ka ama tangar menepa terenlok alitsü aser rongsenkettsüng jenjang ajungtsü atema inyaktsüji tongtibang, ajisüaka pai linük nung kin, oshi-open aser tamangba yimsü balala ajak külemi kati ka akhümtsübutepa longjema alitsü atema mejembir aser meinyaker, iba atemaji minority temi kanga nemjema bilemer. Terenlok mapa aser rongsen kija agi nübur ajakbo melungsür malir, saka ‘pei lima’ ta bilema kecha tetsübu/tarendak makai sadoksadoka tesünep nung liner aika lir. India nunger lenirtemi tangar dangbo India linük ya kin balala, tamangba yimsü balala aser lokti temeyoktep aika külemi tesünep nung longjema litetba linük ka, ta nüma tangtanga jembir, saka jembiba o mapa naji meputeper. Akhidang India nung lenirtemi nüburtem ajak tesünep nung kibong ka ama longjema alitsü mangdang yur inyak. Nüburtem timtemba aser nüktzü ayimba manen tashi parnoki inyaktsü ta temelungtetba tulu yur inyaka aruogo, ajisüaka tanü linük nung minority tembo tsübuseta aliba tia ya ngura parnoki nemjema bilemtsü.