Terenlok mapa inyakbatem reprangtsü atema CM Dashboard tenzüker

Kohima, August 13 (TYO) : State government kübok center aser state government sentong balala ajanga nübortem yaritsü asoshi inyakba terenlok mapatem repranga inyakdaktsütsü asoshi tanü Hombar nü Chief Minister, Neiphiu Rio-i Secretariat Conference Hall, Kohima nung computer nung internet ajanga inyaktsüba CM Dashboard & e-NPS inyakyim sentong ka lapokogo.
CM Dashboard ya https://nl.cmdashboard.nic.in nung angutsü. Ibai electronic window ka lir aser iba ya ajanga government-i inyakba projects/schemes inyakba jenjang reprangtsü akoktsü. Joko, tangbo terenlok mapa inyakdak tesem tonga mouka computer nung iba dashboard ajanga Chief ministeri terenlok mapa inyakbatem repranga anidaktettsü.
Ano, tanüsa e-NPS (Electronic National Pension System) inyakyim ka tenzükogo. Iba inyakyim ajanga government mapa inyakertem shirnok NPS agir, item nüngdakji repranga government-i inyaktsütettsü. Iba e-NPS nüngdak inyakbarenji www.pimsnagaland.in/nps ajanga inyaktsü.
Iba sentong lapokja jembidang, Chief Minister, Neiphiu Rio-i Nagaland ya center nungi yokba sentong tulu aser tongtibangtem inyakba dak dang metaloka alinungji, tangbo iba CM Dashboard sentong ajanga nübortem dang item government sentongtem indang melamelaa shitettsü ta ashi.
Tang state nung department terka kübok sentong 22 inyakdagi aser tanüngba department-tem nunga yakta kasa sentongtem tenzüka aotsü imlar ta Chief minister-isa ashi.
e-NPS inyakyim indang ashidang, iba ama inyakyim ajanga NPS record shitak yutettsü aser nübortem tajungba yaritettsü. Tangbo iba sentong ya Kohima district asoshi dang lapoka lir saka memenui district ajak nung lapokyonga aotsü ta CM-isa ashi.
Iba sentong nung tepela o ka ashidang, Commissioner & Secretary to the CM, Abhishek Singh, IAS-i ashiba agi, tanü lapokba CM Dashboard inyakyim ajanga government sentongtem tali tajungba inyaka otettsü aser iba jagi nübortem ajangzüktsü.
Iba sentong nungsa ‘live video conferencing’ ajanga DG, NIC, Neeta Verma-ia CM Dashboard ajanga nübortem tajangzük angutsüsa amshitsü asoshi inyakyim indang shia liasü.
Kasa sentong nungsa SIO, NIC-i CM Dashboard inyakyim indang ‘powerpoint presentation’ ka agütsü aser OSD, Finance, V. Kezo-i e_NPS indang powerpoint presentation agüja liasü.
Iba sentong nung Chief Secretary, Temjen Toy, IAS menden liasü aser State Chaplain, Rev. Kuzierang Thou-i sarasadema sentong tenzük.