Terepranger kar nüngdaker

Nagaland governor-i dena government ketdangsertem dak temulung malemtsüsa Nagaland nung Naga nunger tulurtemi yanglutetba tensa tia ya temulung ashitsüka lir. Iba jagi balaka governor-i tang ya Nagaland tesem ajak sema jajadagi. Pa taoba hopta Mokokchung nung anenzükba mapang Mokokchung district nung government tenzüker tulurtem den jembidang, Nagaland nung government ketdangser kaji meimchir asütsüla ta ashiba oji angar odang yutsütsüla o masü saka jungjunga bilemdangtsüba o tuluka lir. Nagaland nung tulurtem ya meimchir asütsüla ta ashiba tetezüji ketdangser tulurtem dang, ” nenok ya meimchir masü, nenoki gari lenmang majungba, mozü ki majungba aser school majungba ajanga nübortem timtemba mangur, Delhi nungi Kohima ajanga yokba sen agi kecha inyaka mali, nenoki nenok agitsü dang bushir saka nübortembo memeimer,” ta ashiba o lir. Ibaji tulurtem jak nung parnoki janaba anak bener arua paloktsür amai lir. Aji oda, tanü putu nung tulurtem yabo tulur memesük nübortem asoshi kecha khuret mali, pei agitsü dang bushiba shiruru telokang ka mesük. Aji oda, Nagaland nung tulurtem yagi gari lenmang tamajung nung gari tajung nung necktie mesüloker gari jakdangji pei mapa tenüng zülua maloker senzütsü maaker. Shitakba agibo gari lenmang tamajung nung “ni gari lenmang ketdangser” ta zülur senzütsübaji taaktsüka, kasaji school-tem kata junga anepalu mesütetter nung, ” ni school ketdangser tongtiba” ta pei gari tejakdang maloker senzütsübajia taaktsüka, kasaji mozü kidang shiranger anepalu mesütetter nung, ” ni mozükitem madak tongti ketdangser” ta pei gari jakdang maloker senzübaji aküm taket mapa ka masü. Ajisüaka, asenoki yamaji senzütsü maaker, ibayongji governor-bai Nagaland nung government mapa nung ketdangsertem ya mezüngbuba nung meimchir asütsüla ta metetdaktsü südi. Aji oda, shitakba tanü Nagaland tia agibo gari nung Governor of Nagaland, Chief minister of Nagaland, MP, Minister, Parliamentary Secretary, MLA, Chief Secretary, Commisisoner, Secretary, Deputy Commissioner, Director aser Chief Engineer ta tenüng tululu zülua maloker tarok tapa ajanga pongdanga auyi ponga  senzüba ya meimchir shisa dena mali amato repranger. Meimchir shisatsü adenribo taakba agi yamaji tiaksangabo mesenzütsü. Aji oda, ni iba state nung Governor, Chief Minister, minister aser MLA mesüra tongti ketdangser ka ta pei lima agi pei nümadangteta senzütsüsa asen state ya yanglutettsüla. Iba ama ochimashiba agi temulung melemtet tulu adokba mapang ka, Nagaland governor-i government ketdangsertemi inyakba mapatem reprangtsü asoshi government mapa nung malir telok ka shimer reprangdaktsütsüla (monitor) ta ashibajia government mapa nung alir ketdangser tulurtem asoshi tebilemdangtsü tuluka asütsü. Tanü joko asen lima nung atenba ken ajunga ochimashi aser asen lima teraksa tia nung aliba ken aser sangro mejemba ajunga Naga lima teraksa tia nung aliba indang mejemba angutsü. Aji oda, Nagalangd asoshi mejemba sangro aser kentemji Nagaland atema tanüdangtsü lir. Government nung alirtemibo Nagaland kanga junga renloka odagi ta ashitsü akok saka ibaji shitak asü taiar Nagaland indang ken aser sangrotemi ashitsü. Putu shia tenüng kaka lir, putu karbo yimji yimjung putu, karbo tsüksüngensüngba putu, kar putubo ayawara aruba putu ta putu shia tensa tia balala ajurur. Item tia tensa ajakji iba putu nung alirtemi yangluba putu asütsü. Aji oda, tanü Nagaland nung asenoki ajuruba putu ya Nagaland nung yimsüsür aser tulurtemi yangluba putu lir. Atangji, kecha temenungratsü maket. Ajisüaka, iba putu tashi lirbo alima malitsü ta masü saka Kibuba tanaben maru tashi ojen aotsü, anungji asenoki tarutsü lanurtem asoshi bilema pei mapa nung ochishia ketdang asütsüla. Ochishia ketdangsüba nung temoatsü tulu lir. Aji oda, government ketdangser tulurtemi tang nungi danga, ochishia government tenzükra, ibajia Tsüngrem tenzüker asütsü aser Tsüngrem tenzükertembo kecha agia manüngtsü.