Shitakba lu ayimtsüba mapang

Küm aika Nagaland nung asenoki tiyazü lu yima aruogo, iba jagi Nagaland ya state-bo state saka shitakba state memesük laodi ta asüba mapang ka tongadokogo. Tiyazü lu ayim tenzükbaji, ashiko, government mapa nung alirtemi ‘Travelling Allowance’ tiyazü yanglua agiba nungi tenzük asütsüa akok. Iba amaji kenü nisung kati tiyazü lu tilaka ayim tenzükba nungi oda, oda tiyazü tzülu, tiyazü süngjanglu, tiyazü ango tzübo, tiyazü lenmang, tiyazü ki aser tiyazü aluyimer aser tiyazü yimtaklirtem tenüng nung senotsü taruba ajak agizüka agiba lu tululu ayimer agi Nagaland sünga lir. Joko, tiyazü tenüng aser tiyazü degree bener mapai aiba dang masü saka nisung mali ser ita sen agizüka agiba aser tiyazü pension lu ayimba purtema aika kümogo. Aji oda, Nagaland government meyong files nung zülua aliba den Nagaland alijak nung renlokba jenjang medemdangra, Nagaland dang nungibo alushi tuluba aser Nagaland nung aliba nütsüng dang nungibo anasü agi teimba asadangtettsüa akok. Iba amaji tiyazü, tiyazü agidang asenok tebok sünga aruogo. Ajisüaka, tanü putu yabo tiyazü agi tebok asüngba putu masü. Tiyazüjibo yutsür, shitakba azüngba degree kisüng agia tebok mesüngtettsüba putu nung asenok liadokogo. Tang tashibo asenok tiyazü lu ayimba agi anisüngzüka alir kibong aika lir, saka asenok tiyazü lu ayimba agi anisüngzüka alirtem ya aonung pongmang nung jangratema alirtemang mesük, kechiyong asenok amai asenok chirnurtembo tiyazü lu yima melitetttsü. Tiyazü lu yima alirtemjibo yutsür, shitakba government mapa nung inyakertema, ashiko, kenlirbo ita sena angutsü asü mangutsüar ta küma aotsüba jenjang nung asenok nokdaka lir. Tiyazü, tiyazü nung asenok lia aruba agi, Nagaland nung lanurtem inyaktsüsa shitakba alu kata yimteta maka, lanurtem aika mapa mangu nungji teinyaktsü maka, kar tsüraburtem nem mesüdaktsür aser kar ozüng raksar küma aor ta tensa tamajung ka ajanga Nagaland nung lanurtem odagi. Ashi, yashi to asenoki shitakba alu ayim asübo, item lutem nung tanü lanurtem nümadangdanga jangratema inyaka lila. Atangji, asenoki yashi to shitakba lu ayim asübo lanurtemi government mapatem dang nungibo pei lu nung peisasa tajangzük tuluba ngua inyaka lila. Ajisüaka, asenoki meinyaki ayongayonga nüngdak ajak angutsüsa linüba agi tiyazü lima nung mapang talangka tiyazü lu yima lia aruogo. Joko, asenok tulur tilar ajaki shitakba lu ayimtsü tenzükdi. Government mapa nung inyakertema shitakba office nung jungjunga inyakdi aser government mapa nung meinyakertema kechi mapa inyakdir inyakaka, tiyazü nung senotsü agizüka agitsü atema masü saka shitakba nübortem nem tajangzük agütsür külenang, ano asenoka peria akatsüsa shitakba mapa inyak tenzükdi. Joko, shitakba Nagaland nungi adokba oset aser chiyongtsütem renemer tangaleni yoktsüsa shitakba meranga inyakdi. Joko, tiyazü agi takar akümtsü memerangli saka shitakba agi takar akümtsü merangtepdi. Joko, tazüngertema degree angutsü atema tiyazü ka azüngtsüba masü saka shitakba shisaliok nguteta temetter akümtsüsa azüngtsüla. Tanü tashi asenok Nagaland tiyazüba nung aliba agi zünger mapa mangur ta jembir, saka kodang asenoki shitakba Nagaland nung shitakba lu ayim tenzüka lidir, idangjibo zünger mapa mangur ta jembibato tiyazü akümtsü. Idangjibo, Nagaland shitakba nung mapa inyaker meinyakma asenok shisa tenük agi nguteta inyaktsü. Azüngba ya mapa inyaktsü kisüng azünger masü saka mapa adokdaktsütsü atema azünger, iba shisarajem aser temetetbaji asenoki nguteta shitakba nung mapa küma inyaktsüla. Tiyazü ita sen, tiyazü subsidy, tiyazü commission aser tiyazü allowance agi asenok taküm aser kibong mesüba ya tai dang masü saka taaktsü aser tamakok mapa ta asenoki angatetdi aser shitakba mapa inyaka shitakba taküm lia shitakba Nagaland topur junga takar kümdaktsüdi.