Terepranger maliba lima !

Asen lima indang tajung karbo züluner saka tanü tensa agi zülunüyonga memelar, anungji tanüa asen lima ya terepranger maliba lima amai ka dang reprangtetba tensa tia ka lemsatepner. Nagaland nungsa süaka Kohima aser Dimapur nungi talangka pilar aliba tesemtem nungbo timtem aika liaka nübortemi ola madoki arema alir, kechiyong parnok asoshi government nung ketdangsertemi nüngdaktemji ataloktsütsü ta mebilemer. Tangar lima terepranger aliba limatem nungbo lenmang majungba, light junga maruba, mozü kidang teyari angutsü tim manguba, government meyong kaketreju nung tazünger mali akümba, mitkartemi anir ozüngi memelaba saru meshiba aser shishilembadak jenjang talila meshiba tensa tiaji tesüngmangtsüka lir saka asen lima nung itemji kecha balaka masü, yimya ka dang kümer ayongayonga dang liteper. Aji oda, jet ta meyiper asen lima nungbo tesem kar nung danga lenmang junga lira, light kena mao anogo ka süitetra, pei yim anasa lapoka aliba government mozü kidang tashidak putetra aser tanur junga sotetra, goverment school ka nung danga tazünger noklang junga lira, khu bener aruba garitem dang süngküm nung shingaia saru memeshira aser shishilembadak jenjang shitak meshira, itemjiang tesüngmangtsüka asütsü. Tangar asen limai tayimtsü nung arudang, asen lima Dimapur nung tayimtsü anendak ngur süngmanger, kechiyong tayimtsü anendakji tayimtsü anendak memesük arem aser alu lenmangang mesük saka asenokbo tanga lima nung tayimtsü anendak topur ajungba ngur süngmanger. Terepranger aliba lima nung alir o terepranger maliba lima nung alir na süngmangtepba tetsüngdaji aji lir. Tawa Dimapur nung kaketshir telok kati gari totsü ayokdak totzü meshitak ayokba putetba asenoki angashiogo, kechiyong asen lima nungbo itemji repranger mali. Ano, kaketshir telokisa Dimapur nung dokantem mita oa seret shitak amshir asü mamshir, jenjang shitak meshir asü memeshir, mapang süir aliba mozü aser chiyongtsütem ayoker asü mayoker ta mita aotsü lemtetba asenoki angashiogo, kechiyong itemji mita aoer mali. Ajisüaka, asenok aikati kaketshirtemi itemji meinyaktsüla ta aitsüba angashiogo. Tetezü, itemji mereprangyonga kecha balaka masü arema dang lir ta asenokibo bilemer südi saka kaketshir aser lanurtemibo maremer. Ibaji parnok mapa, kechiyong kaketshir aser lanurtem ya tarutsü asoshi dang masü saka tanüa parnok lenir lir. Taintemia merepranger aser lanurtemia kecha hau ta mali ta asen lima ya tanü ama terepranger mali yutsü nungbo asüng lanurtemsa akoksatsü. Yashi tashi nung atalokbatem khen toktsür, tang Dimapur nung Naga Council-i anir nübortemi Nagaland süngküm asem pezü tashi hopta junga anüktsüsa akümba tiaji jungjunga bilemdangra, Nagaland asoshibo alima tatembang ka arur amai lir. Iba sülen ya dang Nagaland tasen ka tenzük nung shitak asütsü. Tamalen kaketshitemi gari totzü meshitaki yoka lia apudang aser dokantem mita aotsü telemtetba agidang, itemji parnok mapa masü amato asenoki bilemba ama, tanga asenoki Naga Council-i anir Naga nunger kin shia nungi mitkartem shimtetter Nagaland süngküm anüktsübaji asenok mapa masü ta bilemra, Nagaland yangji temadoktsü. Tang amai pei nübotsüka aser pei rongsen lalua inyakba timtem arema  nübortemi government nung alirtemi meshitaki inyakbatem metongshija moura, Nagaland ya Nagaland nung alir meyong masü tangar meyong kümadoktsü. Atangji, tanga maparen aika nung Nagaland ya Nagaland nung alir mulungba nung masü saka tangar mulungba nung aoer. Ibaji tangar tai masü saka asenok tai lir. Asenoki asen lima memeimba agi aser mereprangba agi tangari repranger, anungji tagitsüa tereprangertem meyong akümer. Tenüng agidang Nagaland nung asenok kibur, anungji kibur metettsü atema Nagaland meyong temoatsü noklang nung asenok 10% shi agir aser tanüngba 90% jibo tangar tereprangertem agir. Iba jagi Nagaland mainer. Iba tia ya shibai reprangtsüla ?