Tesayur 40 mapa ‘double’ inyakba putet: Minister Tokheho

Kohima, October 22 (TYO): School Education Department nung tebenja aser teraksa aliba bushiba maparen dak sendakba nung state sorkari tesayur 40 mapa ana (double post) aser itasen ana agiba putetogo.
Osang angazükba agi, sorkari maneni bushisüngdangtsü, aser itasen ana achiba sorkar mapa inyakertem tem anema ken o benoktsü.
Iba ken o ya maneni bushisüngdangtsü atema State Vigilance Commission nem bendanga agütsütsüa akok aser item tesayurtem nem tapet temerenshi agütsütsü.
October 21, 2017 nü Zunheboto district nung Government High School Ighanumi school building tasen semzüktsüba sentong nung jembidang School Education Minister, Tokheho Yepthomi-i, mapa ana inyaker aser itasen ana agir tesayur tajemba agi parnok 40 education department-i putetogo; sorkari aibelener tesayurtem nem temerenshi agütsütsü, ta metetdaktsü.
Küm aika School Education Department nung ochimashi ajanga tenüng menükja arur, aser ibaji merüktettsüji sorkar atema mapa kanga tasak. Ajisüaka Yepthomi-i ochimashi anema inyakdar aser department nung metokmeperi merüktettsü atema inyaker.
Ita ana tejaklen Yepthomi-i iba department agizükdang pai department inyakyim junga bentettsü atema nangzüka nüburtem dang teyari meshia liasü.
Pai ashiba ashi, iba atema sorkar nem tai metongloktsütsüla saka inyakyim bentettsü atema ajaki longjemer inyaktsüla.
Minister-isa, office balala nung ‘attach’ süa aliba tesayurtem ji ‘detached’ asütsü aser peipei school temi yoktsü, ta metetdaktsü.
“Tesayurtem ya office nung inyaktsü atema masü, saka school tem nung sayutsü atema shim. Parnok ya clerk inyaktsü atema shimba masü. Iba dak sendakba nung kobi melii sorkari tetuyuba ka agütsütsü,” ta paisa metetdaktsü.
Tesayur 740 office balala nung attach süa lir, aser parnok timbaka Dimapur nung lir.
Tesayur temelen yokba inyakyim anema Yepthomi-i stakeholders ajak dang tesayurtem arur tanurtem dang sayutsü atema yaritepa inyaktsü mepishi.
Tesasaba olen ka nung pai, yimtsüng kar nungbo yimsüsürtemi tesayur temelen yokba mashishir aser tesayurtem itasen nungi sen 7,000 tashi katir, ta metetdaktsüba den külemi pai, sorkari item ama maparenji repranga dangbo metoktsütsü, ta ashi.
“Ya shiba tai, sorkari asü public? Inyakyim melenshitsüji ajak khuret lir. Sorkar nem tai metongloktsütsüla. Asenok ajak sorkar. Kechiba sorkar nem dang tai tongloktsür?,” ta pai ashi.
Minister-isa school tem mita aoba mapang nung tesayur 1830 bo school nung maliba putet, ta metetdaktsü.
Osang angashiba agi, Minister-i education department nung temelenshi adoktsü atema inyakba mapa agi ketdangsertem aika temelung kanga asür.
Yepthomi-isa, asür kabo pa tenüng nung itasen ita aika agiba putet, ta ashi.
Kasa sentong nung adentsü atema taoba Deputy Speaker, Joshua-i minister meina liasü.
Sentong nungsa Ighanumi Village Council-i tesayur aser office staff tali yoktsü atema Minister nem temepishiba shidi ka agütsü.