Tesayur ka dang nashishi achitsü asoshi asüngdang

Guwahati, September 14 (Agencies): Assam nung tesayur ka dang parnok külemi inyaker tesayur anati, kangshia nashishi achitsü aser islam tamangba yimsüi meyiptsü asoshi nongshir ta asüba ken o police temi bushitüngdangtsü, ta ketdangser kati Bodhbarnü ashi.
Morigaon Deputy Commissioner Hamen Das-i ashiba agi, iba dak sendakba nung lenla ana nungi bushisüngdangtsü asoshi tetuyuba agütsüogo.
“Onoki Inspector of Schools dang tesayur ya regular asü masüar asadangtsü asoshi asüngdangogo. Onoki ano Superintendent of Police dang la shi achitsü asoshi kangshiba aser tamangba yimsü melentsü asoshi tashiyim amshiba ya shidak asü masüar asadangtsü asoshi asüngdangogo. Onoki iba ken o ya kanga süoki agir kechiyong iba ya ozüng raksaba maparen ka lir,” ta pai ashi.
Tesayur la ya Kamrup district, Sonapur tesem nung alir aser lai Assam Chief Minister Sarbananda Sonowal aser Education Minister Himanta Biswa Sarma dangi shidi ka züluogo. Iba shidi nung lai ashiba agi, block education officer aser Deputy Commissioner dangi iba ken o benokba kecha telangzüba mangu.
Lai ashiba agi, tetsübu nung la joko anogo ishika school-i maoer.
“Mezüngbo ni iba ya süoki ia magi aser tensa tajungba akümtsü ta bilem. Ajisüaka tensa tamajungba aküm. Onok külem tesayur kati kü dang Islam tamangba yimsüi melena pa den kibong akümtsü asoshi meneni asüngdanga aru. Iba dak sendakba nung ni head teacher nem osang agütsü saka paia dena pa pusem. Head tesayur aser pa kinungtsü nati ni nashishi achitsü asoshi kangshia liasü,” ta lai ashi.