Tesayur kati kümshia tetsür 50 angadi coaching agütsür

Jaipur, March 06 (Agencies): Ajmer nung aliba missiongary school ka nung tesayur, Sunil Jose-i kümshia class 10 pur tetsür 50 nem angadi coaching agütsütsü tenzükogo.
Kaketshirtemji sorkar school balala nungi lir.
Pai tesüiba küm pongu tashi item kaketshirtem nem coaching agüja liasü aser tesüiba küm ka pai Government Girls Senior Secondary School, Srinagar Road nung anogoshia ghonda ana-asem coaching agüja arur.
Tetsür timbaka iba school nungi lir, kechiyong iba school nung tesüiba küm ka ongko tesayur maliasü.
Iba school nung pa nem class takdang temeja ka agüja lir aser kaketshirtemji school senshiba sülen kidangi moi coaching agir aser anasa alirtembo kidangi orr meyipa arur.
Kerala nungi tesayur Jose ya küm 20 tejaklen Ajmer-i arua St Anselm’s Senior Secondary School nung tesayur inyaker.
Jose-i, “Ozü kiyong nung tetsür aika class 10 sülenbo tazüngba toktsüba aser parnok ongko nung kanga majungbaji ni meteta liasü. Ni yimtii aruba sülen parnok dang sayutsü ni lemtet. Tesüiba küm ana ni ozü kidang tetsür kar nem angadi coaching agütsü. Iba sülen parnok ongko nung ajungba meteta sorkar school kati kü dang hopta nung khen ongko sayutsü kü dang asüngdanga liasü,” ta ashi.
Government Girls Senior Secondary School Principal, Mamta Songra-ia, “Pa dak sayutsü sempet tajung aliba ajanga pre-board exam nung shilem 100% pass asü. Taruba board exam nunga ozü kaketshirtem ajak takok angutsü ni imlar,” ta ashi.