Tesayur Kin Ka

–  I Supong  Longkumer, Darogapathar, Dimapur.

Ocet zülur shiai langka tentangtetba agi tenüngsang agütsüba, ajangshiba, metongshitsüba, aitsüba. Item ajak dang nungi tajungtibaji metongshitepba alitsü südi, kechiaser ibai temeim mapa lir, saka aikati metongshitsübaji maginür kechiba süra tila mekümteter.
Nagaland nung  Khristan masü  karbo alitsü akok, saka Khristan lima ta sangdong nungji ajak Khristan ta kuli agütsür. Sürapang asen kin koda ? Tzüsenba pur dang Khristan, saka asenokbo kibong ajunga Khristan sürapang na shibai tangar  dang sayur, nai nüsasa mesayur no ? Mauyatsü indang nai sayusünger, nai auyar asü? Nai nisung ka dang nüktapangtar ta ashir asü ? Nai kasaji benshir ama ? Nai süngyanglu sempara, tekülemdak aliba osettem nai rakzüker ama ?  Nai shibai ozüng nung ulur nai ozüngji raksaa Tsüngrem aküm metsübur ama ? Roman 2:21-23.  Asen kin ya Isreal kin ama Tsüngremi Naga nunger rongnungi mezüng jatetba kin aser asenoki tesayur mapa inyaka pusu aika aruogo, asenokbo Yisu agizükbaji alima kin nem metetdaktsüogo, saka Isreal kinibo tanü tashi Yisu agizükba mesangdong saka Isreal kinji kenü Tsüngremi bushitsü ta Laishiba nung aiben shia lir, saka tanü tashi magizükba agi khen merenshitsü saka taochi agütsütsü, saka asen kinbo bendanger taochi angur rongnungi süra yamai lia taochi süitemra koda? Asen kin ya Isreal kin mesük  yimsüsüba menden aser arogo kecha tebendang mali ajak Khristan, anungji asenokbo anogo nung asemben sarasatembaji dang masü kechi jembidir/inyakdir ajak nung Lai o agi asenok den jembia anitsü kin ka lir. David yimsüsüba menden mesük, kechiaser paji chuba ka saka Tsüngrem nisung, pai jembiba aser züluba Lai Tsüngrem shisatsü asenoki azünger, paji yimsüsür taküm süaka pai ashi nia kibuba kidang kishinüker ka danga sünüali ta T.Ken nung zülua lir. Saka mebilemdangi par sarudoker ajak yongsük asük, anungji Tsüngrem kanga mepelai temerenshi asem rongnung ka shimang ta ozüng agütsü (i) Küm asem aya wara,(ii) Ita asem na tsükchir jakdang jenshitsü,(iii) Mesüra anogo asem atema tashidak wara yoktsü, kechi südir süaka kabosa ta ozüng agütsü. Iba nungi pa asoshi masü nübur asoshi shimtetba agi Dan nungi Bershiba tashi nung meyi nüter asü, 2 Samuel 24:11-15 yimten yimli nung maibelenerbo tsükchiri memeneper aser makoker, Yisu ashioktsüba Yihudai senpak semer yong Pa ayok ama asen oshi kong, kolen endok, ali tur arem asü ?. Yisui Peter dang ani makong dang nai asemben ni menangzüktsü ta ashiba o ya Peter aser Zebadi chir ana pa den anir oa pa temulung kanga shiranga timtema sarasadem agir ako ana/asem shinung Peteri na taküm Tsüngrem chir Khrista ta shitetba tu pai amar asemben tashi menangzük. Ajaki na toktsür oaka nibo kodanga na toktsür majentsü ta nangzükba pai amma, Mathi 26:31-75 Peterji Yisu ten teti liaka, meteta ka, angatetaka yamaji inyak, tetezü pai Tsüngrem masü nisung tsübu. Galatia nunger dang Pauli ashiba o kechiyong tang ni nisung mulung chidaktsütsü bushir asü? Mesüra Tsüngrem ? Ni nisüng peladaktsütsü meranger ama? Ni nisüng peladaktsüra ni khristalar masü Galatia 1:10. Tanü asen lima nung Tsüngrem tenzükertem iba tia nung tenzüktepdagi.