Tesayur mapa ya tezüpa masü; tushir aser akhümtsübur: Tongpang Ozukum

Dimapur, Rongjui (September) 5 (TYO): September 5, 2018 nü Town Hall, Mokokchung Ao Kaketshir Mungdang (AKM)-i 57 buba Teachers Day 2018 ayongzüka amung.
Iba sentong nung PWD Minister, Tongpang Ozukum-i o jembidang tesayurtemi lanur takümtem melenshitsüba atema pelaba metetdaktsü.
Kaketshirtem ya asüng atema lennirtem lir, anungji tesayurtemi lanurtem senso tajung ka ka akümtsü atema anitettsübaji kanga tasak lir. Ajisüaka, iba tayongzükba agizüka inyakertem nem tetushi agütsütsü tim aser akhümtsübutsüla, ta Tongpang-isa ashi.
PWD Minister-isa tesayurtem dang kaketshirtem meima aser aremzüka tesayuba aser shisatsü agütsütsü atema ayongzük.
Iba sentong nung tesayur 17 nem District Teachers Award 2018 agütsü.
Sentong nung AKM tir Imkongwati-i tesentepertem pela agizük, Associate Pastor Women, MTBA, Shilula Imchen-i tesayurtem atema balaka sarasademtsü, District Education Officer, Mokokchung-i o tatsüka ka jembi aser Jubilee Memorial School, Care Foundation, Town Higher Secondary School aser Hill View Higher Secondary School kaketshirtemi shilem balala agi.