Tesayur Naroküm

~   Talitemjen Imchen.

(Takokba Sempet, Nüngo, mesüra Naroküm bener arudang, osang kaket nung telok balalai Konang Aser Tetoshi Agütsür ta kenteta zülur ocet adoktsüba ya, tangari agütsüba bener arurji, joko AGÜTSÜBA masü PELABA zülutsü nüngdaker. KANGA PELAR, TENÜNG ASANGER mesüra TENÜNG TAJUNG BENER ARUTSÜBA/ARUTETBA PELAR ta melenshi jungdi sü ta shidanger).
Konang ya temko mesüra korang (Crown) nungi agizükba olong ka lir. Konang tetezü temko nung inokba mesüra tekolak nung inoktsüsa tenüng tajung kechisa angur, ajak dangji ajatsü akok. Naroküm olong ya konang rongnung tulutiba asütsü asü ta nibo shisadanger. Asenoki tsürabur naroküm semchir tenüng jatsür. Aser tsüraburji aseni memetetaka, semchir tenüng nung jagi tsüraburji kechi koma lia aru mesüra parnok mapatemji naroküm tenüng ajanga tanüdangtsü küma tuluba kabo metetadoker.
Engraji nung AWARD ta tenüng jatetba ya nisung ka tenüng mesüra pa/la naroküm mamai ayutsü mechi olongji yangluba amai lir. Aser Ao oshi nung NAROKÜM olong jagiang award olong denji tulu ka sendakteter. Aser ‘award’ dangji ‘naroküm’ ta ajatsü kanga junger. Tatishitsü agi, 5th Sept. 2015 tesayurtem rongnung tesayur naroküm shirnoksa angu? Mesüra Dr. Radha Krishnan Naroküm tesayur shirnoksa angu (?) ta jembitsü kanga junger. Naroküm (award) kaji iba tashibo jenjang asütsü mesüra telok nung züngsem ya tashibo alitsüla ta atakteta maka. Naroküm kaji sen, Dogma, kulizülu aser oset balala amshitsü akok. Iba den telok tulu asütsü akok mesüra telok tila asütsü akok.
Ni tesayurtem anogo nü TESAYUR NAROKÜM agizükba ya taoba kümtem mapang kanga süoki iabo mebilem aser bilemaa maliasü. Saka taküm küm “State Level Teacher Award” angurtem noksa osang kaket mezüng tapak nung angu. Aser naroküm angur ajakji tejak terabo tashitem dang liasü. Ashiko “District Level Teacher Award” angurtemji ni mangu saka tejak tashitem dang asütsü akok.
Ni “District Level Teacher Award” angurtem noksa manguji, niang tai asütsü akok. Naroküm angurtem tejak tashi shimteta agütsübaji kanga junger. Ano tejak lanu kar densema tarutsü anogotem nungbo narokümji ngusem nung, iba jagi lanur atema tajungshiba tulu asütsü. Kuli tajung ngur ano pa/la nungi nübur tenzüktsü tejangraba tajungji chimia oadok nungbo ta tsübua bilemyong, tejak lanutem asoshi maongkaji matatsür asü ta kü mulung nungbo jangjonger. Saka asenok tsürabur kentet nung, “Alu Alaba Nashi Dak Tepang Nung Lisü Agi Talen” ta ashi ama, pei taa mesüra tangutsü timji agütsütsü mesüra angutsü nüngdaker. Tamangba tsütsü reverend süang mesüra tentet balala tsütsü naroküm balala angurtem süang, ken tenüng tajung angukaji taküm piyong iba tenüng tajungji wazüka ayutsüla ta ozüngbo masü. Hau pa/lai aji wazüka ayutsü merangra kanga junger. Saka shir telok südir, “Alu Alaba Nashi Tepang Nung Lisü Agi Alena Mayutsüla.” “Shirang Yipten Mapang Mozü Achi Ama” pa/lai junga inyakba mapang mesüra temsüa aliba mapang toshitsüji kanga nüngdaker.
Tawa tanü putu, lokti ajak nübur rongsen dak rangloker wadang balala inyaktepba mapang ka, late Immakmangyang kinüngtsü Merentula aser chirnuri rongsen tsütsü yaria, IMMAKMANGYANG AWARD ta ser tesayur anogomong den repsema, Chuchuyimlang süngküm küpok tesayur inyaker rongnungi shimteta, taküm nungi iba naroküm agütsür ta angashidang kanga pelaa liogo. Aser tesayur atema dang masü nübur asoshi ibai tatishitsü tajung ka lir. Ashiko yimti nungji tejak tashi tesayura aika dang alitsü. Parnoki junga mesayur ta masü saka watsü Longsangnaro, tejak mashi ka nem iba (Immakmangyang Award) 2015 TESAYUR NAROKÜM agütsübaji mapang tetemsü ka nung Village Education Committee jagi apiteta inyakogo ta temulung süa bilemer. Ashiko taküm Nagaland state kübok teacher award angurtem rongnung (sorkar award mesüra mulungtet telok award) laji tanutsüla asütsüa akok.