Tesayur pungu nem Rotary Nation Builder’s Award agütsü

Rotary Nation Builder’s Award agizüker tesayurtem den tongti tesemdanger Mokokchung DEO Wt. I. Satemmenla aser Rotary Club Mokokchung ketdangsertem noksa nung angur. Mkg, Sept, 8, 2016.

Mokokchung, Sept. 8 (TYO): Rotary Club Mokokchung-i ayongzüka ‘International Literacy Day’ agizüka amongba den repsema Rotary Nation Builder’s Award agütsüba sentong tajung ka Brihostibar aonung par Mokokchung Rotary kidang meraketa agiogo.
Taküm Rotary Nation Builder’s Award-ji Mokokchung telungtet nung aliba sorkar school pungu nungi tesayur pungu nem agütsüogo. Award agizükertemji; GPS Majakong nungi Sashi, GPS Kichutip nungi Chubatuba, GPS Mongsenbai nungi Bendangienla, GPS A & B Sector Penli nungi Imtisüngküm aser GPS Lijaba-Lijen nungi Alemsangla nungertem liasü. Award angur nem senpet sen den nüngo tajung kaka agütsüogo.
Tanü iba sentong nung tongti tesemdanger Mokokchung District Education Officer (DEO), Wt. I.Satemmenla-i jembidang, tesayur mapa ya mapa ajak yangluba/poktetdaktsüba mapa ka asünung, tesayur ka khuretji tatembang maka. Kodang asenoki sayuba tanur kati takok tajung ngudir mesüra taküm junga lia odir tesayurtem asoshi tepela tulutibaji yangji lir, ta ashi.
State nung azüng-zülu metetba (literacy rate) jenjangbo tupet atur aser asenok indang literacy rate ya national average dang 10% agi teimba lir. Literacy rate tupet atuba amaji mapa manguba tebilemtsüa ulura kümdagi, ta laisa ashi. Azüng-zülu renlokba den chichiba education-jia külemi aotsüla, aji mesüra asenoki sayuba education ya tasüngdangtsü lir, ta laisa shisem.
Linük yangertsü asoshi chichiba education agütsütsübaji kanga nüngdaker. Chichiba education agütsütsü asoshi grade tajung angutsü asoshi sayuba dang masü, saka iba dang alia textbook nung maliba teinyaktsü wadang aika lir, asenokji school tanurtem atema taküm lesson kaka akümtsüla, ta shia laisa ayongzük.
Tanurtemi pei azüngba kaket riju nungi toktsür oaka, parnok taküm nung chichiba education-ji mepilatsüsa aser lokti nung khuret metetba senso kaka akümtsüsa tesayurtemi sayutsü nüngdaker, ta laisa ashi.
Tebilemba aser inyakyim tasen nung lanurtemi temelenshi balaka bener marura, tang asenoki ajuruba lokti tebilemtsü ya aneptsü tasak asütsü, ochi aser libaliro nung asentenshi adokba ajanga dang iba nungi nüchi angutsü, ta laisa ashi.
Iba sentong nung special guest Ao Kaketshir Mungdang (AKM) tir, Jemtimenba liasü aser paisa Chichiba linük yanglurtem onük nung ajemdaker tagitsü o aika shia tesentepertem ayongzüka liasü.
Award angur tenüng nung tesayur Sashii mapang tatsüka agia Rotary Club-i iba ama sentong tajung yanglua tesayurtem tushiba asoshi pelaba lemsatep.