Tesayur tajungtibaji kütsü liasü: Tir Pranab Mukherjee

New Delhi, September 04 (Agencies): Tanü linük Tir, Pranab Mukherjee-i, pai takok  anguba ajakji tetsü ajanga lir, ajisüaka pa kanga samaru liasü aser pai la nem kanga timtem agüja aruogo, ta ashi.

“Kü tesayur tajungtibaji kütsü liasü. Ni samaruba ajanga kütsü asoshi ni ya temzüktsü tanur ka liasü, la dak nungi ni tazük aiben chiogo,” ta pai ashi.

Iba sülen la kü dangi arua temeim agi ni anepalua mesüzük aser kü dang anüdok nungi anülu tashi ni inyakba ajak tatongi ashi, ibaji ni tatongi lepshia ashitsüsa akum,” ta tanü Rashtrapati Bhavan Estate nung aliba school ka nung class 11 aser 12 pur kaketshirtem dang Pranab-i ashi.

Teachers Day atongtsü anogo ka jilia Tir-i, tetsürtemji tesayur tajungtiba, ta ashi.

“Nütsüji tesayur tajungtiba ta ni nenok dang ashir,” ta pai Dr Rajendra Prasad Sarvodaya Vidyalaya kaketshirtem dang ashi.

Mukherjee ya West Bengal, Birbhum district kübok Mirati yimtsüng nung aso. Iba state ya nüjiso atema rara Kamada Kinkar Mukherjee aser Rajlakshmi nunger sotetdak state lir. Paisa, pa tebu jail aser party office na tsüngda kanga mazüngi liasü aser tetsüi la anepalua aru, ta ashi.

Pai ashiba agi, pa par yimtsüng nung teburtem den külemi asayaba den nashi chiyimba miena senzü. “Ajisüaka anü aluba mapang ni kidangi ilonga aru, kechiyong ni yimtsüng nung alir ka süaka ni tammang kanga tsübua liasü,” ta Mukherjee-i ashi.

“Ni kanga samaru tebur ka liasü. Ni tanen makai kütsü nem timtem agütsü. Ni amanger, nenokbo shinga iba tashiji samaru malitsü südi,” ta api ashidang kaketshirtem kanga menütep.

Indian political history nung ghonda ka class agidang Tir-i, “Tanübo ni minister ka mesüra Tir ka masü. Ni nenok Mukherjee sir lir,” ta ashi.

“Ni average kaketshir ka dang liasü. School atongtsü atema ni kilometer pongu jaja aser lenmang alangba atema ni ashishia kütsü dangsa ashi. Lai kü dang, iba asoshiji tanga lenmang mali ta shia mapang ajak nung meranga inyaktsü lai ni ajungshi,” ta paisa shisem.