Tesayurtem 15 nem State Teachers’ Award 2018 agütsü; Telatetba sülen manidaknürtemi mapa nungi anentsüla: K T Sukhalu

September 5, 2018 nü NBBC Convention Centre, Kohima nung agiba State Teachers’ Day  sentong nung State Level Teachers’ Award angurtemi School Education Advisor,  K.T. Sukhalu aser tanga tongti lennir aser ketdangsertem den külemi agiba noksa angur. 

Kohima, Rongjui (September) 5 (TYO): Bodbarnü Nagaland-ia linük den külemi Dr S Radhakrishnan bilemteta Teacher’s Day amung.
Directorate of School Education-i tanü NBCC Hall nung sentong ayonga agidang tesayur 15 nem State Teachers’ Award 2018 agütsü.
Sempet angurtem rongnung tetsür pungu aser tebur 10 lir aser parnokji sorkar school 10 aser nija school 5 nungi lir.
“Asenok taküm aisü nung melenshitsüsa asen tesayurtemi asenok anitetogo. Nursery nungi university jenjang tashi nung tesayurtemi parnok tashi ajanga nisung ka raksatsütsü mesüra yanglutsütsü koka lir” ta SCERT & School Education Advisor, MLA K T Sukhalu-i ashi.
Tanü alima kanga dang kara ainba den asen education sector anidaktsüla aser tesayurtemi item tayongzükbatem koktettsü atema parnok tajungba akümtsüla, ta K T Sukhalu-isa ashi.
“Nenoki kaketshirtem ajungmesotsü atema teaching method meyipa reprangshitsüla aser melenshitsüla” ta paisa shisem.
“Nagaland nung kaketshirtemi Maths aser Science nung marks junga manguba atema mepelar. Annual Status of Education Report 2017 ajanga Nagaland nung arishi küm 14-18 tsüngda aliba kaketshir 30.4%-i dang simple division inyakteter, 37.7%-i dang Calculation & evaluation inyakteter aser NE nungi kaketshir 19.6%-i dang arithmetic inyakteter ta ashir” ta K T Sukhalu-isa metetdaktsü.
“Tanur ka arishi küm 6-8 tsüngda nung taküm yanglur aser iba mapang tanur ka tekolok indaktsütsü atema physical aser psychological tesayuba agütsütsüla. Asen School Education sector nung infrastructure mesüra Human Resource Development tsütsü süang, teinyaktsü aika lir. Ajisüaka, school temi takok ngua mapa meinyakba angudang tezü atanger” ta paisa ashi.
Sorkar school aikati nil results anguba atema pai tesayurtem dang 2019 nung Government High Schools aser Higher Secondary Schools-i NIL results mangutsü tenangzükba agitsü atema ayongzük.
“Ni GHS aser GHSS ajak nung Head Master, Assistant HM aser subject teachers (talisa Maths aser Science) mapa lemzüktsütsü tebilemba ka lemsatepogo. Ajisüaka, iba atema tetsükdaktsü ajurubaji tesayurtemi seniority onük atema okadak ken o benokba ajanga lir, ta Sukhalu-isa shisem.
Sorkar tesayur kari mapang latettsüba aser takhangba agüja lungkak aitba atema mepelaba olen ka ashidang “sorkar aser nija mapatem nung telatetbatem lir aser item mapa bushirtemi telatetbatem meteter ang mapa bushir aser inyaker. Anungji pei mapa indang telatetba magizüker aser telatetba sülen manidaknürtemi mapa nungi anentsüla” ta paisa ashi.
Paisa meta talang pilar alilen nendaka inyakba tesayurtem nem tenüngsang agütsü aser parnok dang ‘unsung Heroes of the department’ jaloktsü.
Sukhalu-isa tesayurtem dang pei pei indang AADHAR number agütsütsü atema nenshia metetdaktsü.
Department-i kobi melii tesayurtem indang attendance reprangtsü atema AADHAR linked biometric system tenzüktsü ta paisa shisem.
Sentong nung Dr Neilhouzhü Kire GHSS kaketshirtemi Dr S Radhakrishnan nem tetushi agütsü, Bethel HSS kaketshirtemi tesayurtem nem sempet agütsütsü aser TMGHSS kaketshirtemi tesayurtem nem tetushi agütsü.
Sentong nungsa Baptist Mission School, Jotsoma-i linük naklu ken aten, SDB rector & Parish Priest, Christ the King Church, Rev Fr Paul Punü-i temoatsü meshia sarsadem, Principal Secretary, Menukhol John-i tesentepertem pela agizük aser Coraggio School Kohima nungi Vitsaho Zhotso-i tesayurtem tushia onük jembi.