Tesayurtem Anogo

Shisaluyimba mapa ajanga tesayurtemi asen lokti nung temelenshi bener arutsüba atema aser tekolok lanutem nem kaket shisatsü agüja anitetba atema tetushi agüja kümshia India nung Tesayurtem Anogo amunger. India nung taoba Tir Sarvepalli Radhakrishnan nem akhümtsübu agüja pa tasoba anogo nung Tesayurtem Anogo amunger aser taküma linük tesem balala nung sentong tapumeina ayongzüka tesayurtem tushir. Nagaland nunga school, college aser kaket shisatsü agütsüba reju balala nung kaketshirtemi sentongtem ayongzüka tesayurtem tushir. Nagaland nung tesayur tajung aika lir aser kaketshirtemi dang masü state sorkaria item tesayur tajungtem ajiteta tetushi agütsür. Pei mapa angateta inyakba, pei tanur ama kaketshirtem meima anitetba, mapang shitak nung itasen monguaka tezümetangi mapa nung nendaka inyakba, pei talidak nungi meta talangka pilar mapa lemzükaka meranga inyakba, aser ano item mesükba tangatet tesayur tajung aika lir aser itemji angudang aser item amala tesayurtem indang osang angashidang kanga pelar aser Nagaland nung aliba tesayurtem ajak parnok amaji dang südaktsünüa  bilemer. Ajisüaka, tanü iba anogo amungdang temulungjang nung tasüngdangba ka arur aser ibaji “Ya atangji kaketshirtemi pei tesayur meimba agi aser akhümtsübuba agi tushir asü mesüra tenüng atema dang?”. Oda tesayurjibo tushitsü malang sernung tangar den liromedema Tesayurtem Anogo ta asüba agi tushirba dang asü mesüra kaketshirtem parnok chichiba mulungsentsü agi tushitsü dalang ta angateta tushir? ta tebilemba arur. Tesayurtema tanü kaketshirtemi nenok nem tetushi agütsüdang nenok mulungjang nung tasüngdangba kar ali asü mali? Ni inyakba yari tetushi angur ta asü nibo mapa shitak meinyak sernung tetushi angur ta bilemer. Tanü iba anogo amungdang tesayurtemi pei mulungjang nung arokaroka shisadangtsüla, kechiyong Nagaland nung tesayur aika khuret mebeni inyakba angur aser angashir, aser itemji angudang aser osang angashidang kanga sasaseta bilemer.  Tenüng atema inyakba tesayur, itasen dang ngura ojang ta tangatetba nung inyakba tesayur, temelen inyaker yutsür itasen lemdanga agiba tesayur, school-i onüdang aotsü, mounüdang maotsü ta asüba tesayur, lesson junga mebushii orr kuli küpdok sayuba tesayur, oda tesayur ta ajatsü malangba nisung aika tesayur inyakdar aser tanü item amala tesayurtem tushia amungbaji temulungi magizükteter. Tanü tesayurtemji tarutsü putu anitetertem lir aser shitakba agibo pei shia aliba ajak sayuba denang ano talila angazüker sayutsüla. Nisung ajakibo tesayur meinyaktet aser aika rongnung kari dang iba maongka ngua inyaker. Anungji tanü iba anogomung nung Nagaland nung aliba tesayurtemi pei wadang tali angatetshitsü aser tebilemtsü khuret angateter asüng nungi pei tajungtiba nung inyaka aotsü ayongzüker. Sangküm kaketshirtemi Tesayurtem Anogo nung nenok nem tetushi agütsüdang nü mulungjang taroktiba agi iba tetushi agizükteta amungtsüsa metokmeperibatem melenshitsü ayongzüker.