Tesayurtem bendanga agütsüshitsü ayongzük

Dimapur, August 23 (TYO): Bodbarnü NBCC, Conference Hall, Kohima nung 2 buba All Nagaland Government Schools Teacher’s Conference tembangba sentong agiogo.
Iba sentong nung tongti tesemdangerji Economics & Statistics and SCERT Parliamentary Secretary, Er. Kropol Vitsu liasü.
Sentong nung Er. Kropol-i o jembidang, SCERT-i iba mungdang ayongzüka agiba atema tenüngsang agütsü.
Iba mungdang nung adenba ajanga tesayurtem ajangzüker alitsü imlar aser nenok pei talidaki meyipa orr, nenoki angazükbatem lemsateptsü ayongzüker, ta paisa ashi.
Tesüiba mapang tesayurtem akhümtsübuba ama tanü asüngbo metsübur aser iba ya bendanga magütsüba, nendaka meinyakba, yimya tamajung benshiba aser training shitak magibatem ajanga lir. Anungji tesayurtemi alima melenshiba den liromedema inyaksangshi melenshitsüla aser bendanga agütsüshir inyaktsü ayongzüker, ta Er. Kropol-isa ashi.
Sentong nung School Education Principal Director, Smita Sarangi-i tesentepertem pela agizüka jembidang, education system nung keta aliba onük aika lemsatep.
School Education Department-i nung tanü khuret aika lir saka onoki inyakyim tajungba kümdaktsütsü atema meranga inyaker. Kaketshir nem quality education agütsütsü atema onoki mapa inyaker, ta lai metetdaktsü.
Smita Sarangi-isa tesayurtem dang quality education agütsütsü ayongzük aser department dang iba ama sentongtem ayongzüka tesayur nem shisatsü agütsütsü shisem.
Iba mungdang nung district 11 nungi tesayur 450, DEOs & SDEOs 22 aser Nagaland Private Schools Association president den tanga züngsemtem aden, ta Additional Director, SCERT, T. Sekhose-i metetdaktsü.
Sentong nung mendenji Principal Director, School Education, Smita Sarangi liasü, tesayurtem rongnung Savino aser Zingkai nati tenati ajangshibatem lemsatep aser Additional Director, SCERT, Kezhalenuo Kesiezie-i anküp tepela o jembi.
Anogo ananü mungdangji State Council of Education Research and Training (SCERT), Department of School Education aser SSA temi ayongzüka amung.