Tesayurtem bilemtetba anogo

Mapa ajak rongnung mezüng tetenzükdak aser tematiba mapaji tesayur mapa ya lir, anungji tesayur mapa dang ya mapa ajak tetsü (mother of all professions) ta ajar. Tesayur kati pai mesüra lai sayuba tanurtemji pa dang nungi temetetba, tuluba aser tematiba menden nung amentsüsa sayutetter. Nisung ka taküm nung pei dang nungi tangar temeimba meima inyakba mapaji tesayur mapa ya lir. Item tesayurtem jagi pei lima aser nübortem meimba aser tarutsü putu asoshi teti khuretsa bilemba senso tajung adokdaktsür. Tanü ya linük ajunga nung item tesayurtem bilemteta amongba anogo lir. Aji oda, linük nung amongba anogotem rongnung iba tesayurtem anogomong yasa tongtibangba aser tajangzük keta amongba anogo asütsü. Atangji, tesayurtem anogo amongba ya longsulongbenba benjong ka masü saka tesayurtem mapa aser khuret bilemteta parnok nem tenüngsang agüja ajungshiba anogo lir. Iba anogomong yagi tesayurtem o tanurtem na tsüngda tali temeimtep aser telongjem adokdaktsür. Tesayurtemi kaketreju nung kaktshirtem kanga meima sayur saka parnok dang pelar ta ashitsü mapang mangur, anungji tesayurtem anogo ya tanurtem asoshi pei tesayurtem dang kanga pelar ta ashiba anogo lir. Atangji, tesayurtem anogo nung tanurtemi sempet balala agütsüner aser shidi nunga o tajung zülur parnok dang pelaba metetdaktsüner. Ajisüaka, tanurtem rongnunga kasa masü, kar sensaker aser kar takar, anungji aji meteta school aika nung tanurtem nem sempetbo magütsüdaktsür saka school nung sentong tajung yanglua tanurtem nem tesayurtem pelatsüsa shilem tajung agidaktsür. Talisa, asen lima nungbo government  school-tem dang nungibo private school nung inyakertem ita sen kanga agia tajemba angur saka küm tatem result nungbo private school tesayurtemi sayuba tanurtemi jenjang tajungba angur. Item ama tesayurtem nemji tenüngsang peria agütsütsüba anogoji tesayurtem anogo ya lir. Iba tesayurtem anogo ya India yimten nüchiso ngur mezüng tadong tir aser tanabuba tir Dr.Sarvepalli Radhakrishnan asoba anogo lir. Pa ya Telugu nunger tsürabur kibong ka nung 1888 küm September 5 nü aso. Pa ya tashitemeteter aser tesayur tajung ka liasü. Iba jagi balaka tesayurtemi linük asoshi tenlaba mapatem pai angatet aser pa tasoba anogo nung pa kija bilemteta lalushibonga amongtsü melen teayurtem ajak bilemteta amongtsü asoshi kaketshirtem dang metetdaktsü. Dr.S.Radhakrishnai aginüba amaji, tesayurtem anogomong nung tesayurtem nem tenüngsang agüja parnok asoshi sarasademtsür. Iba jagi ano tesayurtem mulungjang nung tali tajungba inyaktsü ajungshir. Atangji, tesayurtemi tesayurtem anogo nung sempet tajung tuluka angutsü meimlar, saka lai mesüra pai sayutetba mesüra sayuba tanurtemi la mesüra pa dang kanga pelar ta ashiba o kija jagi tesayur tenük nungi tepela nüktzü aludaktsür. Iba nüktzüji tesayur ka asoshi Award ajak dang tematiba sempet lir. Iba tepela aser tajangzükji meteta tesayurtem anogo nung government-i aser School kiburtemi tesayurtem nüng sanga sarasadem sentong tajung ayongzüka agibaji tarutsü lima tajungba küma yangluba sentong asütsü. Aküm ajak dang tesayur aküm tuluba aser anogo ajak rongnung tesayurtem anogo yasa tongtibangba , ibaji meteta tanurtemi dang masü saka tsüraburtemia tesayurtem nem tenüngsang agüja parnok asoshi sarasademtsütsüla. Iba tangatetba nung tesayurtem anogo ya meshimetsüba anogo ka ama masütsüsa, asenoki taoba hopta nung iba osangkaket nung lemsatepba ama, tesayurtem anogo tenüng nung tanurtem nem ‘Teachers’ Day tickets’ yokdaktsüba sobaliba tamajung yabo anenadoktsüla. Kecha memetetba tanur agi senso tajung kümdakja sayutetba tesayurtem dang kanga pelar aser tenüngsang agütsür. Tarutsü Naga lima tajungba ka asoshi tesayurtem taküm aser mapa nung Tsüngremi ano tali moajangma !