Tesayurtem mapa meinyakba ajanga sorkar school 49 timtemer

Kohima, September 14 (TYO): August 21, 2015 nungi Nagaland RMSA Teachers Association tesayurtemi school-i moii lungkak aitba ajanga sorkar school 49 nung tetsükdaktsü ajurur.

Taoba ita trok tashi sorkari parnok nem itasen magütsüba atema Nagaland RMSA Teachers Association lungkak aittsü tenzük.

Hombarnü The Hub conference hall nung osangbener den sensaksem mapang ka alidang Nagaland RMSA Teachers Association tir, Thejazelie-i ashiba agi, December 2014 nungi School Education Department-i parnok nem itasen magütsütsü tenzük aser taküm March nung ita asem indang itasen agütsü.

Ajisüaka, iba sülen nungi Department-i parnok itasen magütsür aser joko ita trok jungogo, ta Thejazelie-isa ashi.

Paisa ashiba agi, senotsü nung timtem tulu ajuruaka Nagaland nung RMSA tesayur 194-i aremzüka dang aru aser June ita nungi Department nung Director, Commissioner, Secretary aser Minister nungertem den ajurutepa parnok khuret lemsatep.

Ketdangsertemi parnok nem magütsüi aliba itasen tekaratiba nung agütsütsü ta tiyazü nangzükba dak alaka mapa kecha meinyak. Anungji Association züngsemtemi mapa meinyaki lungkak aittsü tenzük aser ibaji ajanga Government High Schools 44, Government Higher Secondary School 2 aser Government Middle School 3 nung tetsükdaktsü ajuru, ta Nagaland RMSA Teachers Association tir-isa metetdaktsü.

Sorkari August ita tashi itasen magütsüra, tesayurtemi lungkak aitba manentsü, ta paisa shisem.

State sorkari yaküm RMSA kübok sen lemzüktsüba ajanga mapa inyakbatem indang utilisation certificate magütsüba agi Union Ministry of Human Resource Development-i itasen magütsür ta parnoki angazükba olen ka RMSA-i tanü ashi.

RMSA tesayurtem teloki akhangba ajanga state sorkari Kohima dak alaka, tanga district nung RMSA tesayurtem nem taoba ita pezü indang itasen agütsüogo. Ajisüaka, sorkari mechimenu masü saka tang tashi magütsüi aliba itasen ajunga agütsütsüla, ta Nagaland RMSA Teachers Association züngsemtemisa ashi.

“Tesayurtem ama, onoki kaketshirtem sayutsü atema nendaka aser süoki ia inyaker, anungji department ketdangsertemi tesayurtem atema bilemtsütsüla. Meta talanglang pilar alidak inyaker asünung onoki Kohima-i arua Directorate ketdangsertem den tetibo mejembiteter,” ta parnokisa shisem.

Bangdak school ketdangsertemi school-i arutsü atema onok dang ashir, aser ano külen selection exams agitsü mapang tonga arur. Mapang shitak nung course tembanga inyaktsüla aser ano question papers renemtsüla. Anungji item nung timtem kar danga ajurura ibaji RMSA tesayurtemi masü saka sorkari tebilemtsü khuret abentsü, ta parnokisa metetdaktsü.